Ички ишлар органлари терговчилари учун малака ошириш курси ўз ишини бошлади

Ҳуқуқни муҳофаза қилиш академиясида Ички ишлар органлари терговчилари учун “Ички ишлар органларида терговни ташкил этиш масалалари” мавзусида малака ошириш курси бошланди.

Курс дастури ҳодиса жойини кўздан кечиришнинг умумий қоидалари, тезкор-қидирув тадбирлари, экспертиза текшируви учун намуналар олиш, жабрланувчининг шикоятига асосан қўзғатиладиган жиноятлар бўйича терговга қадар текширув фаолиятини ташкил этиш, бир неча жиноят содир этилганда қилмишни квалификация қилишнинг айрим масалалари, тезкор-қидирув фаолияти натижаларидан жиноят процессида фойдаланишни ташкил этиш, одам савдоси жиноятларини фош этиш билан боғлиқ тергов ҳаракатлари ва бошқа масалаларни ўз ичига олган.

Малака ошириш курси Ўзбекистон Республикасининг “Одам савдосига қарши курашиш тўғрисида”ги Қонуннинг мазмун-моҳияти, мулоқот ва унинг таркибий қисмлари, ўзига хос хусусиятлари, мулоқотнинг новербал воситалари, рақамли криминалистика асослари, исбот қилишда сўроқ қилишнинг ўзига хос хусусиятлари ва процессуал жиҳатлари, фирибгарлик жиноятини тергов қилишнинг умумий ва махсус жиҳатлари, тезкор-қидирув, терговга қадар текширув, суриштирув ва дастлабки тергов фаолиятини амалга ошириш жараёнида жиноий фаолиятни молиявий жиҳатларини ўрганиш тартибига оид тингловчиларнинг билим ва кўникмаларини оширишга йўналтирилган.