Прокуратура фаолиятини психологик таъминлаш бўйича вебинар

Бош прокуратура Академияси томонидан прокуратура органлари фаолиятини психологик таъминлаш ва хизматга касбий психологик танлаш бўйича ишлар халқаро мутахассисларни жалб қилган ҳолда амалга оширилмоқда.

Академиянинг халқаро ҳамкорлик фаолияти доирасида, прокуратура органларида психологик менеджментни тадбиқ қилиш бўйича таклифларни ишлаб чиқиш мақсадида, Академияда видеоконференция шаклидаги ишчи вебинарлар ташкил этилган бўлиб, унда М.В.Ломоносов номидаги Москва Давлат университетининг профессори, психология фанлари доктори Т.Ю.Базаров иштирок этди.

 Ушбу тадбирда Академия раҳбарияти, прокуратура фаолиятини психологик таъминлаш бўлими ва Академиянинг бошқа бўлим ходимлари иштирок этдилар.

Иштирокчилар раҳбарлик лавозимларига кадрлар заҳираси тизимини яратиш, прокурор-тергов ходимларининг юқори ва ўрта бўғин раҳбарлари компетенциялари моделини ишлаб чиқиш масалаларини муҳокама қилдилар.

Мутахассисларнинг алоҳида эътибори прокурорнинг раҳбар сифатида эга бўлиши лозим бўлган малака ва компетенциялар таркибини ишлаб чиқишга қаратилди. Айнан шу компетенцияларнинг прокуратура органлари раҳбарлигига номзодларни баҳолашда қўллаш масаласи алоҳида таъкидлаб ўтилди.

Ушбу тематика доирасидаги навбатдаги вебинар сентябрь ойида ўтказилиши режалаштирилган.  Курс натижасида замонавий талабларни ҳисобга олган ҳолда прокуратура фаолиятини психологик қўллаб-қувватлаш сифатини ва самарадорлигини оширишга қаратилган тавсиялар ишлаб чиқилиши кўзда тутилган.