Академияда “Раҳбар ва ёшлар” учрашуви ташкил этилди

Академияда “Ёшлар форумлари” доирасида “Раҳбар ва ёшлар” очиқ мулоқоти ўтказилди.

Тадбирда Академия раҳбарияти, таркибий тармоқлар раҳбарлари ҳамда бакалавриат талабалари иштирок этишди.

Анжуман жараёнида талабалар Академиянинг ўқув ва бошқа биноларида олиб борилаётган капитал таъмирлаш ишлари ҳамда қурилиши режалаштирилган янги лойиҳалар билан таништирилди.

Шунингдек, очиқ мулоқот давомида Академия ташкил этилган ўқув жараёни ўзига хослиги, малакавий амалиёт, ҳарбий тайёргарлик ва ҳарбий хизмат, талабаларни илмий клуб ва тўгаракларга жалб этиш, иқтидорли талабаларни қўллаб-қувватлаш, талабалар билимини баҳолашнинг рейтинг тизими, назорат (имтиҳон) турлари, юқори натижаларга эришган талабаларни қувватлаш юзасидан батафсил тушунтиришлар берилди.

Тадбирда талабалар хорижий таълим муассасалари билан ҳамкорлик, талабаларнинг нуфузли хорижий олий таълим муассасаларида амалиёт ўташ, ҳуқуқий саводхонликни ошириш мақсадида видеороликлар тайёрлаш, Академияда турли лойиҳалар ташкил этиш, кибержиноятчиликка қарши курашишга ихтисослаштирилган тўгарак ташкил этиш, кутубхона фондини янада бойитиш ва бошқа йўналишларда таклифлар беришди.

Тадбир жараёнида Олий таълим муассасалари ўртасида ўтказилган “Заковат” интеллектуал ўйинида 2-ўринни эгаллаган Академия жамоаси, “Криминалистика ва суд экспертизаси билимдони” викторинаси ғолиблари ҳамда шахмат ҳамда шашка спорт турлари бўйича ўтказилган Академия чемпионати ғолиблари сертификатлар билан тақдирланди.

Мазкур турдаги тадбирлар мунтазам олиб борилади.