«Ёш экологлар» тўгараги аъзолари томонидан дарахт экиш акцияси ўтказилди

Сўнгги йилларда мамлакатимизда экологик хавфсизликни таъминлаш, экологик вазиятни яхшилаш, ўсимлик дунёсини асраб-авайлаш, чиқиндиларнинг инсонлар соғлиғига зарарли таъсирини олдини олиш, санитария ва экологик ҳолат сифатини ошириш учун қулай шарт-шароит яратиш бўйича комплекс чора-тадбирлар изчил амалга оширилмоқда.

Бу борада бутун мамлакат миқёсида амалга оширилаётган «Яшил макон» умуммиллий лойиҳаси республикамиз ҳудудида ўсимлик дунёсини кўпайтириш, атмосфера ҳавосини тозалаш ва чанг-тўзонларни олдини олишда муҳим ўрин тутмоқда.

Шу мақсадда Ўзбекистон Республикаси Ҳуқуқни муҳофаза қилиш академияси томонидан яшиллик даражасини ошириш ва кўкаламзорлаштириш бўйича тадбирларни ташкиллаштириш, ёшлар ўртасида экологик таълим ва маданиятни юксалтириш, экология ва атроф-муҳитни муҳофаза қилиш соҳасидаги тизимли муаммоларни бартараф этиш бўйича таклифлар тайёрлаш, шу билан бирга экологик ҳаракатларда талабаларнинг фаол иштирок этишларини таъминлаш мақсадида «Ёш экологлар» тўгараги ташкил этилиб, тўгарак аъзолари томонидан қатор тадбирлар амалга ошириб келинмоқда.

Жумладан, ушбу тўгарак аъзолари «Табиатни асрайлик» шиори остида ўтказилган дарахт экиш акциясида иштирок этиб, тадбир доирасида «Ёш экологлар» томонидан Юнусобод тумани «Собиробод» маҳалла фуқаролар йиғини ҳудудида 50 дан ортиқ манзарали ва мевали дарахт кўчатлари экилди.