Erasmus+ дастурининг танловида ғалаба

Бош прокуратура Академияси ва Лунд университети (Швеция) Европа Иттифоқининг Erasmus+ таълим дастури бўйича ўтказилган танловда навбатдаги ғолибликни қўлга киритдилар.

Дастур тингловчилар ва ўқитувчиларнинг академик ҳаракатчанлигини янада ривожлантириш, қўшма таълим дастурларини амалга ошириш (double degree), хорижий мутахассисларни ўқув жараёнига фаол жалб етиш, Европа ECTS кредит тизимини (European Credit Transfer and Accumulation System) амалга оширишга қаратилган.

Илгари ҳамкорликда амалга оширилган Erasmus+ дастури натижасида малакалардаги, таълим дастурлари ва стандартларидаги, академик семестр тузилишидаги тафовутлар ҳамда ҳужжатларни тан олиш ва ўқув предметини топширишдаги муаммоларни ҳал этишга эришилган эди.

Орттирилган тажриба Академияда таълим жараёнининг сифатини бошқариш тизимини такомиллаштириш, билим ва инновацион технологияларнинг интеграциялашуви, академик ҳаракатчанлик дастурлари самарадорлиги мезонларини аниқлаш асосларини жорий этиш имконини берди.

Шу муносабат билан, Лунд университети билан янги Erasmus+ 2020 дастурини амалга ошириш ҳаракатчанликни рағбатлантириш, шу жумладан масофавий ҳаракатчанликни кенгайтириш, инновациялар ва илғор тажриба алмашиш, таълимнинг юксак даражаси ва унга эришишни таъминлаш, Бош прокуратура Академиясининг академик капиталини ривожлантириш ва тараққий эттиришга йўналтирилади.