ИИВ суриштирув ва тергов ходимлари учун касбий қайта тайёрлаш курси ташкил этилди

Ўзбекистон Республикаси Президентининг “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида” ги ПФ-257-сон Фармони ижроси доирасида Ўзбекистон Республикаси Ҳуқуқни муҳофаза қилиш академиясида Ички ишлар вазирлигининг суриштирув ва тергов тузилмалари ходимлари учун касбий қайта тайёрлаш курси бошланди. 

Касбий қайта тайёрлаш курси дастурига асосан мамлакатимизда амалга оширилаётган кенг қамровли ислоҳотлар жараёнида қонун устуворлигини таъминлаш ва қонунийликни мустаҳкамлаш мақсадида жиноятларни ўз вақтида фош этиш, жиноятларни тергов қилиш методикаси ва тактикасини самарали белгилаш асносида жиноят ишлари бўйича мустақил иш юритиш кўникмаларини ривожлантириш ҳамда  терговга қадар текширув ҳужжатлари ва жиноят ишларини ўрганиш асосида уларнинг алоҳида турлари кесимида таҳлил ва диагностика қилиш, шунингдек, ҳуқуқбузарликлар профилактикаси ва жиноятчиликка қарши курашиш фаолиятини услубий ва консультатив таъминлаш масалаларини ўз ичига олган назарий ҳамда амалий машғулотлар ўтказиш режалаштирилган.

Касбий қайта тайёрлаш курси давомида тингловчилар ўзларининг амалий фаолиятларида келиб чиқаётган муаммоли вазиятларни таҳлил қилиш асосида, Академия профессор-ўқитувчилари ҳамда ўқув машғулотларига жалб қилинган бошқа мутахассислар иштирокида тегишли касбий ҳуқуқий тушунтиришлар ва тавсиялар ишлаб чиқишади.

Касбий қайта тайёрлаш курси якуни бўйича тингловчиларга дипломлар топширилади.