“Спорт – тинчлик ва дўстлик элчиси” шиори остида навбатдаги учрашув ўтказилди

Ҳуқуқни муҳофаза қилиш академиясида талабалар ва тингловчиларнинг спортга бўлган қизиқишини юксалтириш, соғлом турмуш тарзини кенг татбиқ этиш, жисмоний тарбия ва спортни ривожлантириш мақсадида машҳур спортчи иштирокида “Спорт – тинчлик ва дўстлик элчиси” шиори остида навбатдаги учрашув ўтказилди.

Бу сафарги тадбир меҳмони Ўзбекистон Республикаси Миллий гвардиясининг ҳарбий хизматчиси, Ўзбекистонда хизмат кўрсатган спорт устаси, Олимпия ўйинлари ва Жаҳон чемпионати совриндори, IBF ва WBA камарлари соҳиби, капитан Муроджон Аҳмадалиев бўлди.

Учрашув давомида спортчи ўзининг босиб ўтган машаққатли йўллари, эришган ютуқлари, хизмат фаолияти ва спорт соҳасини уйғунликда олиб бориш, спорт ва жисмоний тарбияни инсон ҳаёти ва ҳар қандай соҳадаги ўрни ва аҳамияти ҳақида ўртоқлашди.

Тадбир илиқ ва кўтаринки руҳда ўтди, талабалар ўзларини қизиқтирган барча саволларига етарлича жавоб олдилар.