Ўзбекистон Республикаси Ички ишлар вазирининг ўринбосари – Тергов департаменти бошлиғи Р.Ашрапов Ҳуқуқни муҳофаза қилиш академияси фаолияти билан таништирилди

Ички ишлар вазирининг ўринбосари – Тергов департаменти бошлиғи Р.Ашрапов Ҳуқуқни муҳофаза қилиш академиясига ташриф буюрди.

Ташриф давомида Академияда ўтказилаётган ўқув жараёнлари, яратилган шарт-шароитлар, фойдаланилаётган замонавий ўқув-методик ва ахборот технологиялари таништирилди.

Хусусан, тадбирда Академиядаги киберполигон, криминалистика полигони, суд иммитация хонаси ва махсус лабораторияларнинг имкониятлари намойиш қилинди.

Шу билан бирга, прокуратура, дастлабки тергов ва суриштирув органлари ходимларининг узлуксиз касбий ривожланишини мониторинг (диагностика) қилиш тизимининг тақдимоти ўтказилди.

Тақдимот жараёнида тизимнинг ходимларни касбий, нокасбий ҳамда жисмоний ва ҳарбий тайёргарлигини синовдан ўтказиш, диагностика натижалари асосида ходимлар учун керакли ўқув дастурларини шакллантириш, улар учун методик тавсияларни ишлаб чиқишда ифодаланувчи имкониятлари кўрсатиб ўтилди.

Тадбир якунида келгусида Ички ишлар вазирлиги билан Академия ўртасидаги ҳамкорлик алоқаларини ривожлантириш масалалари муҳокама қилинди.