Ҳуқуқни муҳофаза қилиш академияси жамоаси экологик акцияларнинг фаол иштирокчисидир

Ҳуқуқни муҳофаза қилиш академияси ходимлари ва тингловчилари экологик хавфсизликни таъминлаш, экологик вазиятни яхшилаш, табиий ресурслардан оқилона фойдаланиш, экологик вазият сифатини яхшилаш учун қулай шарт-шароитлар яратиш, экологик онг ва маданиятини юксалтиришга қаратилган тадбирларда фаол иштирок этиб келмоқда.

Хусусан, Академия жамоаси жорий йилнинг 25 март куни атроф-муҳитга ғамхўрлик қилиш муҳимлигини эслатиш ва шу орқали Ернинг табиий ресурсларини сақлашга ҳисса қўшиш мақсадида ташкил этилган "Ер соати" акциясида иштирок этди.

Акция доирасида бинода бир соат давомида электр энергияси ўчирилди, ходимлар яқин атрофдаги кўча ва хиёбонлар бўйлаб сайр қилишди.

Бундан ташқари, жорий йилнинг 29 март куни Академия жамоаси Ўзбекистон Республикаси Президентининг 2024 йил 21 февралдаги “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури”ги ПФ–37-сон Фармони ижроси доирасида ташкил этилган “Автомобилсиз кун” акциясини фаол қўллаб-қувватлади.

Автомобил чиқинди газларининг атроф-муҳитга салбий таъсирини камайтириш, соғлом турмуш тарзини тарғиб қилиш, атроф-муҳитни муҳофаза қилиш масалаларига жамоатчилик эътиборини жалб қилиш, шаҳарларда автомашиналар ҳаракатини камайтириш ва жамоат транспортини ривожлантириш мақсадида ташкил этилган тадбир доирасида Академия ходимлари ва талабалари иш ва ўқиш жойларига жамоат транспортидан фойдаланган ҳолда шунингдек пиёда келишди.

Академия бундай тадбирларни мунтазам равишда ўтказиб туради, зеро сайёрамиз ресурсларига ғамхўрлик қилиш йўлидаги ҳар бир қадам, шубҳасиз бизнинг келажагимизга ўз таъсирини қўрсатади.