Рақамли криминалистиканинг замонавий усуллари тергов фаолиятида

Ҳуқуқни муҳофаза қилиш академиясида Ўзбекистон Республикаси прокуратураси, Ички ишлар вазирлиги ва Давлат хавфсизлик хизмати терговчилари учун “Тергов ҳаракатларини амалга оширишда рақамли криминалистиканинг замонавий усулларидан фойдаланиш” мавзусида ўқув курси ўтказилди.

Ўқув курси дастури тингловчиларнинг рақамли криминалистика соҳасидаги назарий билим ва амалий кўникмаларини такомиллаштиришга йщналтирилган бўлиб, унда рақамли қурилмаларни олиб қўйиш, таҳлил қилиш ва маълумотларнинг криминалистик тасвирларини яратиш усулларига асосий эътибор қаратилди.

Иштирокчилар очиқ ахборот манбаларига асосланган пассив Интернет разведка воситаларини (ОСИНТ) ўзлаштирдилар, шунингдек, яширин Даркнет тармоғи ресурсларидан фойдаланиш билан боғлиқ жиноятларни тергов қилиш методологиясини ўргандилар.

Амалий машғулотлар жараёнида терговчилар мобил қурилмалардан маълумотларни ажратиб олиш, текшириш ва тиклаш учун махсус дастурлардан фойдаланиш бўйича кўникмаларини ривожлантирдилар.

Бундан ташқари, терговчилар криптоактивлар ва криптоҳамёнлар билан ишлаш, криптоактивларни хатлаш ва олиб қўйиш усулларини ўзлаштириш бўйича амалий тажрибага эга бўлдилар.

Мазкур курс давомида ўзлаштирилган билим ва кўникмалар тергов амалиёти ходимларига рақамли далилларни самарали тўплаш ва таҳлил қилиш имконини беради, жиноятларни тергов қилишда юқори даражадаги далиллар базасини таъминлайди.