Ғарбий ва Марказий Осиё давлатларининг активларни қайтариш бўйича идоралараро тармоғининг (ARIN–WCA) Умумий йиллик йиғилиши ўтказилди

Вена шаҳрида (Австрия) БМТнинг Гиёҳвандлик ва жиноятчилик бўйича бошқармаси штаб-квартирасида Эрон давлати раислигида Ғарбий ва Марказий Осиё давлатларининг активларни қайтариш бўйича идоралараро ноформал тармоғига (ARIN-WCA) аъзо давлатларнинг Умумий йиллик йиғилиши бўлиб ўтди.

Тадбир Ўзбекистон Республикаси Ҳуқуқни муҳофаза қилиш академияси – ARIN-WCA тармоғининг доимий Котибияти вазифасини амалга ошириши доирасида БМТнинг Гиёҳвандлик ва жиноятчилик бўйича бошқармаси билан ҳамкорликда ташкиллаштирилди.

Йиғилишни ўтказишдан асосий мақсад – 2023 йилда мазкур тармоқ доирасида амалга оширилган ишларни сарҳисоб қилиш, шунингдек жиноий активларни қайтариш борасида идоралараро халқаро ҳамкорликни янада кенгайтириш ҳисобланади.

Умумий йиллик йиғилишда 10 га яқин давлатдан 30 дан ортиқ вакил, хусусан, Бельгия, Британия, Озарбайжон, Нидерландия, Покистон, Қирғизистон, Қозоғистон, Тожикистон, Туркманистон, Ўзбекистон, Эрон давлатларининг прокуратура, ички ишлар, ташқи ишлар, адлия, молиявий разведка, коррупцияга қарши курашиш ва тергов идораларининг масъул ходимлари, шунингдек CARIN (Европол) ва GlobE тармоқлари котибиятлари вакиллари ҳамда БМТнинг Гиёҳвандлик ва жиноятчилик бўйича бошқармаси, Европада хавфсизлик ва ҳамкорлик ташкилоти, Жаҳон банки (StAR) экспертлари иштирок этишди.

Тадбирда ARIN-WCA тармоғига аъзо давлатларнинг жиноий активларни қайтариш соҳасида амалга оширган ишлари, тармоқни самарали бошқариш ва унинг доирасида ҳамкорликни кенгайтириш масалалари, амалиётдаги мавжуд муаммоларнинг муҳокамаси бўлиб ўтди. Йиғилиш иштирокчилари томонидан шунингдек активларни қайтариш соҳасидаги ижобий тажриба ва амалиётлари юзасидан тақдимотлари амалга оширилди.

Бундан ташқари йиғилиш доирасида ARIN-WCA тармоғига аъзо давлатлар вакиллари учун “Жиноий активларни қайтариш – тергов ҳаракатлари ҳамда активларни қайтариш офислар фаолияти” мавзусида семинар-тренинг ташкил қилиниб, унда CARIN тармоғи (Европол), БМТнинг Гиёҳвандлик ва жиноятчилик бўйича бошқармаси, Бельгия, Британия, Нидерландия экспертлари активларни қайтариш офислари томонидан активларни қайтариш самарали механизмлари ва воситалари тўғрисида тақдимотларини қилишиб, мазкур соҳада ўз тажриба ва амалиётлари билан ўртоқлашишди.

Тадбирлар ишчан ва информатив тарзда ўтказилиб, иштирокчилар активларни қайтариш соҳасида фаол ҳамкорлик қилишга ҳамда ARIN-WCA тармоғини келгусида янада ривожлантиришга тайёр эканликларини билдиришди.