Фавқулодда вазиятлардан муҳофаза қилиш ва фуқаро муҳофазаси ойлиги доирасидаги тадбирлар

Ўзбекистон Республикаси ҳуқуқни муҳофаза қилиш академиясида Фавқулодда вазиятлардан муҳофаза қилиш ва фуқаро муҳофазаси ойлиги доирасида бир қатор тадбирлар ташкил этилди.

Асосий мақсад – иштирокчиларни турли табиий ва инсон томонидан келтирилган фавқулодда вазиятларда қандай ҳаракат қилиш кераклиги ҳақида хабардор қилиш ва керакли кўникмаларни ривожлантириш.

Шу мақсадда Фавқулодда вазиятлар вазирлиги масъул ходимлари томонидан махсус тактик машғулотлар кўрсатиб ўтилди. Бу машғулотлар талабалар, академия ходимлари ва бошқа иштирокчилар учун нафақат билим, балки амалий кўникмаларни ҳам ошириш имконини берди.

Тадбир доирасида иштирокчиларга сув тошқинлари, зилзила, қор кўчиши каби табиий офатлар вақтида қандай ҳаракат қилиш лозимлиги бўйича атрофлича тушунчалар берилди. Бунда хавфсизлик чораларини кўриш, вазиятни тўғри баҳолаш ва зарур ҳаракатларни амалга ошириш муҳим ҳисобланади.

Шунингдек, ФВВ махсус техникаси жалб қилинган ҳолда амалий машғулот ўтказилди. Бу машғулот иштирокчиларга фавқулодда вазиятларда ўзини қандай тутиши, атрофдагиларга қандай ёрдам бериши мумкинлигини амалий жиҳатдан кўрсатиб берди.

Тадбир давомида талабалар ва бошқа иштирокчилар ўзларини қизиқтирган саволлар билан мурожаат қилиш имкониятига эга бўлишди. Масъул ходимлар томонидан берилган жавоблар, иштирокчиларнинг билимларини мустаҳкамлаш ва уларни янада хавфсизлик маданиятини юксалтиришга ёрдам берди.

Бу тадбирнинг аҳамияти нафақат академик билимларни бойитишда, балки реал ҳаёт вазиятларида фуқароларнинг ўзини тутиши ва хавфсизлигини таъминлаш маданиятини оширишда катта ёрдам бериши мумкин. Академия ва Фавқулодда вазиятлар вазирлиги томонидан ташкил этилган бу тадбир, фавқулодда вазиятлардан муҳофаза қилиш ва фуқаро муҳофазасини янада мустаҳкамлашга қаратилган муҳим қадам бўлди.