Академия – экологик тадбирлар иштирокчиси

Академиянинг талабалари плоггинг экологик ҳаракатида фаол иштирок этишди. Плоггинг (швед. термоқ, йиғмоқ ва югурмоқ сўзларидан шаклланган) экологик ҳаракати бир вақтнинг ўзида ҳам спорт билан шуғулланиш, ҳам атроф-муҳитни тозалашга йўналтирилган.

Тадбир Тошкент шаҳрининг Мирзо Улуғбек номидаги Марказий паркида ўтказилди ва унда талабалар чиқиндиларни йиғишда фаол иштирок этишди. Тадбир натижасида 100 га яқин чиқинди тўлдирилган қоплар йиғилиб, бу тадбир иштирокчиларининг атроф-муҳитни ҳимоя қилишга бўлган масъулиятли муносабати ва қўшган ҳиссасидан далолат беради.

Академия жамоасининг плоггинг ҳаракатидаги фаол ва мунтазам иштироки Академиянинг экологик ташаббусларни қўллаб-қувватлашини яққол намойиш этади. Бу ҳаракат орқали нафақат спорт билан шуғулланиш, балки атроф-муҳитни асрашнинг аҳамияти ҳам кўрсатиб берилади. Тадбир давомида Академия талабалари ва ходимларидан иборат иштирокчилар биргаликда ҳаракат қилиб, атроф-муҳитни тозалаганлари уларнинг жисмонан соғлом бўлишларига ҳамда руҳияти ва кайфиятига ҳам ижобий таъсирини кўрсатади.

Академия жамоаси ўзининг экологик ҳаракатларга ҳамнафас эканини кўрсатиб, келгусида ҳам шундай ташаббусларда фаол қатнашишга тайёрлигини билдирган ҳолда, атроф-муҳитни ҳимоя қилишдаги муҳим ҳиссаларини кўрсатди.