Ҳуқуқни муҳофаза қилиш академиясида очиқ эшиклар куни

Ўзбекистон Республикаси Ҳуқуқни муҳофаза қилиш академияси ўз фаолиятини очиқлик ва шаффофлик тамойилларига асосланиб амалга ошириб келмоқда.

Бугунги кунда Ҳуқуқни муҳофаза қилиш академияси прокуратура ҳамда суриштирув ва тергов фаолиятини амалга ошириш ваколатига эга давлат органлари учун малакали кадрлар тайёрлашга масъул ягона ихтисослаштирилган олий таълим ва илмий-тадқиқот муассасаси ҳисобланади.

Яъни, келгусида прокуратура ва тергов соҳаларида ишлаш мақсадида юрган ёшлар бундай имкониятга фақатгина Ҳуқуқни муҳофаза қилиш академиясида таҳсил олиб эришишлари мумкин.

Академияда тергов фаолияти ва ҳуқуқни муҳофаза қилиш фаолиятининг бошқа соҳаларида олий таълимнинг икки босқичли тизими – бакалавриат ва магистратура дастурлари бўйича тўлақонли ўқув жараёнлари йўлга қўйилган.

Айни кунларда Ҳуқуқни муҳофаза қилиш академиясида 2024/2025 ўқув йили учун “Тергов фаолияти” мутахассислиги бўйича таълимнинг кундузги шакли учун магистратурага қабул жараёнлари бошланган.

Шу муносабат билан, 2024 йил 17 май куни Ўзбекистон Республикаси Ҳуқуқни муҳофаза қилиш академиясида навбатдаги очиқ эшиклар куни бўлиб ўтди.

Тадбирга Тошкент шаҳри мактаблари, юридик олий таълим юртлари битирувчилари, ота-оналар, шунингдек ОАВ вакиллари ташриф буюрдилар.

Меҳмонларни Академия раҳбарияти ва ходимлари, Бош прокуратура вакиллари, ҳуқуқни муҳофаза қилиш органлари фахрийлари қарши олдилар.

Иштирокчилар Академия бакалавриати ва магистратурасига қабул ва ўқув жараёнини ташкил этишнинг ўзига хослиги ва афзалликлари билан яқиндан танишдилар.

Академияга қабул қилишда абитуриентларнинг муайян тоифаларига республиканинг бошқа олий таълим муассасаларига кириш учун қонунчилик ҳужжатларида назарда тутилган имтиёзлар татбиқ этилмайди.

Муҳими, Академия битирувчилари ваколатли давлат органларига хизматга қабул қилинганда фақат офицерлар таркибига кирувчи ёки даражали унвон берилиши кўзда тутилган лавозимларга тайинланади.

Тергов ва прокуратура соҳаси кадрларини тайёрлаш, қайта тайёрлаш ва уларнинг малакасини ошириш тизими билан яқиндан таништириш мақсадида меҳмонлар учун Ҳуқуқни муҳофаза қилиш академиясида экскурсия ташкил этилди.

Тадбир давомида Академиянинг махсус полигонида иштирокчилар тергов-криминалистика тактикалари ва методикаларини амалий қўллаш имитациясида, шунингдек воқеа жойини кўздан кечириш ва жиноятни очишга оид қизиқарли квест мусобақасида иштирок этишди.

Шу билан бирга, экскурсия давомида меҳмонлар криминалистика хонаси, суд имитацияси хонаси, экспертиза лабораторияси ва бошқа амалий ҳамда вазиятли машғулотлар ўтказиш учун махсус жиҳозланган хоналарни кўздан кечирдилар.

Ҳарбий-ватанпарварлик йўналишидаги машғулотлар, саф тайёргарлиги машқлари ёшларда ҳаяжон ва қизиқиш уйғотди.

Республикамизда биринчи бўлиб ташкил этилган Академия DarkWeb киберлабораторияси, тергов жараёнларида полиграф (детектор) технологияларини қўллаш, шунингдек мобил криминалистик автолаборатория имкониятлари имкониятлари ёшларда айниқса катта қизиқиш уйғотди.

Шу вақтнинг ўзида ўқишга талабгорлар учун консультациялар ташкил этилди.

Билимга чанқоқ ёшлар ва катталар учун Академияда ташкил этилган китоб ярмаркаси катта аҳамият касб этиши табиий.

Академияда очиқ эшиклар куни ўтказиш яхши анъанага айланиб бўлди, бундай тадбирлар тизимли равишда ўтказиб келинади.

Академия матбуот хизмати

Тел.: 71-202-04-96 (1737)