Академия бакалавриатининг “Тергов фаолияти” йўналиши бўйича ўқишга номзодлар диққатига

Вазирлар Маҳкамасининг 2023 йил 6 апрелдаги 143-сон қарори билан тасдиқланган “Ўзбекистон Республикаси Ҳуқуқни муҳофаза қилиш академияси бакалавриатига ўқишга қабул қилиш ва ўқитишни ташкил этиш тартиби тўғрисида”ги Низомга (Низом) асосан дастлабки танловдан ўтиб, қуйидаги номзодлар махсус психологик танлов ва ёзма имтиҳонда иштирок этиш учун тўловни амалга оширганлар:

ҳарбийлаштирилган йўналиш бўйича 1-иловага мувофиқ;

ҳарбийлаштирилмаган йўналиш бўйича 2-иловага мувофиқ.

Махсус психологик танлов, ёзма имтиҳон ва тест синовида иштирок этмаган талабгорларга тўлов қайтарилмайди.

Номзод махсус психологик танлов ҳамда ёзма имтиҳон (диктант)да иштирок этиш учун танланган танлов ўтказиш ҳудуддаги иловадаги манзилга 2024 йил 9 июнь соат 09:00га қадар паспорт ёки ID-карта билан (шахсий кабинетдаги маълумотлар (синов ўтадиган аудитория, жой) билан танишган ҳолда) етиб келиши лозим.

Имтиҳон ўтказиш вақти ва манзиллари ҳақида тўлиқ маълумотни шахсий кабинет орқали танишиб боришингиз мумкин.

Шунингдек, “Тергов фаолияти” йўналиши бўйича ўқишга қабул қилиш танловида иштирок этувчи номзодлар жорий йилнинг 5 июндан 25 июнга қадар (25 июнь куни ҳам) тест синови топшириш учун my.uzbmb.uz сайтида рўйхатдан ўтиши ҳамда тест синови топшириладиган фанлар мажмуаси (“Юриспруденция” ва “Чет тили”), таълим тили ва тест топшириш ҳудудини танлаши лозим.

Тест синовлари июль-август ойларида ўтказилади.