Учтепа туманида “Ватаннинг содиқ ёшлари” мавзусидаги ўқув йиғини

Ҳуқуқни муҳофаза қилиш академияси томонидан хотин-қизлар учун махсус ишланган дастур асосида ташкил этилган “Ватаннинг содиқ ёшлари” мавзусидаги ўқув йиғини давом этмоқда.

Мазкур ўқув йиғини доирасида пойтахтнинг барча туманларидан
1 минг 500 нафардан ортиқ ёш хотин-қизларнинг қамраб олиниши режалаштирилган.

Навбатдаги ўқув йиғини Учтепа туманида ташкил этилиб, унда Тошкент шаҳрининг Учтепа, Сергели, Чилонзор ва Олмазор туманларидан 150 нафардан ортиқ хотин-қизлар иштирок этишди.

Ўқув йиғини дастури ёшларни психологик таъминлаш, касбга йўналтириш, бандликка кўмаклашиш, ҳуқуқий билимлар бериш, ватанпарварлик, Ватан тақдирига дахлдорлик, ўз юртига ва халқига муҳаббат туйғуларини сингдириш, оила, фарзанд тарбиясига бефарқ бўлмаслик каби фазилатларни шакллантиришга қаратилган муҳим мақсадларни қамраб олган.

Машғулотлар нафақат Академиянинг малакали мутахассислари томонидан, балки республикамизда танилган психологлар, педагоглар, юристлар ва мураббийлар, халқаро ташкилотлар, хусусан UNICEF экспертлари ва волонтёрлари томонидан интерактив методларни қўллаган ҳолда ўтказилмоқда. Бу ўз навбатида курснинг натижадорлигига ижобий таъсир ўтказади.

Ўқув йиғинида иштирокчиларга юртимизда ёшлар учун касб эгаллаш, билим олиш, тадбиркорлик фаолиятини амалга ошириш, хорижий тилларни ўрганиш ва бошқа йўналишларда давлатимиз томонидан бериладиган имтиёзлар ва имкониятлар ҳақида маълумотлар берилди.

Ўқув йиғини доирасида шунингдек ҳар бир иштирокчи хотин-қизнинг муаммолари анкета-сўровнома асосида алоҳида ўрганилиб, уларининг ҳал этишда кўмаклашиш юзасидан амалий чоралар кўрилмоқда.

Тадбир якунида фаол иштирокчиларга қизиқарли ва ёшларга мўлжалланган бадиий китоблар ҳам тарқатилди.

Ўқув йиғинлари барча туман ёшлари билан давом эттирилади.