Самарқанд шаҳрида “Илм-фан ва илмий тадқиқот йўналишларини ривожлантириш истиқболлари” мавзусида семинар

Ҳуқуқни муҳофаза қилиш академияси томонидан Шароф Рашидов номидаги Самарқанд давлат университети юридик факультети талабалари ҳамда прокуратура органлари ходимлари учун “Илм-фан ва илмий тадқиқот йўналишларини ривожлантириш истиқболлари” мавзусида семинар ташкил этилди.

Тадбирда Ҳуқуқни муҳофаза қилиш академияси, вилоят прокуратураси, Инсон ҳуқуқлари бўйича Ўзбекистон Республикаси Миллий маркази, Ўзбекистон Республикаси Фанлар Академияси ҳузуридаги Давлат ва ҳуқуқ институти вакиллари иштирок этди.

Ҳуқуқни муҳофаза қилиш академиясида илмий-тадқиқот фаолиятини амалга ошириш масалалари юзасидан Академия бошлиғининг ўринбосари ю.ф.д., проф. М.Мамасиддиқов маъруза қилди.

Маърузачи иштирокчиларни Академия магистратураси ҳамда олий таълимдан кейинги таълим институтида таҳсил олиш имкониятлари, илмий фаолиятни амалга ошириш шарт-шароитлари, мустақил изланувчиликка қабул қилиш тартиби ва шартлари, илм-фан ва ҳуқуқни қўллаш амалиётидаги мавжуд муаммоларни бартараф этиш ва унинг назарий асосларини кучайтириш йўлида ҳамкор ташкилотлар билан илмий фаолият йўналишида олиб борилаётган ишлар, илм-фан йўналишида “Ўзбекистон–2030” стретегияси мазмун-моҳияти юзасидан хабардорлигини оширди.

Тадбир якунида иштирокчилар ўзларини қизиқтирган саволларига жавоблар олишди.

Ҳуқуқни муҳофаза қилиш академияси томонидан чоп этилган нашрлар университет кутубхонасига совға қилинди.