Бош прокуратура Академиясида янги муҳокамалар клубининг биринчи учрашуви

Бош прокуратура Академияси илмий асосланган хулосалар ва қонунчиликни такомиллаштириш ҳамда ягона ҳуқуқни қўллаш амалиётини шакллантириш борасида тавсияларни ишлаб чиқишда фаол иш олиб бормоқда.

2018 йил 10 октябрда Академияда жиноятчиликнинг олдини олиш масалаларига бағишланган муҳокамалар клубининг биринчи учрашуви ўтказилди.

Ташкил этилган клуб ҳуқуқ ва ҳуқуқни қўллаш амалиётидаги энг долзарб муаммоларини муҳокама қилиш, ечимларни ишлаб чиқиш учун турли соҳалардаги мутахассисларни бирлаштиришга мўлжалланган.

Тадбирда Академия вакиллари, "Минтақавий мулоқот" халқаро нодавлат ташкилоти эксперти Г.Уэдлл (АҚШ), шунингдек, видеоконференция воситалари орқали Лунд Университетининг (Швеция) ҳуқуқ социологияси ва жиноятчиликка қарши курашиш соҳасидаги экспертлари Р.Уринбоев ва П.Олссонлар иштирок этдилар.

Норасмий шароитда йиғилиш иштирокчилари самарали ташкилий-ҳуқуқий чора-тадбирлар, фаол жамоатчилик иштироки орқали жиноятчиликни қисқартириш масалаларини муҳокама қилдилар. Шунингдек, бу соҳада Америка Қўшма Штатлари ва Швеция тажрибаси билан танишдилар.

Учрашув қатнашчилари ўрганилаётган соҳаларда кенг кўламли тавсияларни ишлаб чиқиш учун бундай учрашувларнинг муҳимлигини таъкидладилар.

Академия муҳокамалар клубининг навбатдаги учрашуви 2018 йилнинг 26 октябрига режалаштирилган.