Ўзбекистон Республикаси Ҳуқуқни муҳофаза қилиш  академиясида иккинчи ва ундан кейинги олий таълимга қабул қилиш тартиби

Ўзбекистон Республикаси Президентининг 2022 йил 28 ноябрдаги ПФ–257-сон Фармони 9-банди ва Вазирлар Маҳкамасининг 2021 йил 24 сентябрдаги 606-сонли қарори билан тасдиқланган “Ўзбекистон Республикаси олий таълим муассасаларида иккинчи ва ундан кейинги олий таълимни олиш тартиби тўғрисида”ги низомида олий таълим муассасалари бакалавриат таълим йўналишлари хусусиятидан келиб чиқиб, иккинчи ва ундан кейинги олий таълимни таълим муассасаларида мавжуд бакалавриат таълим йўналишлари ва таълим шаклларида ташкил этиш назарда тутилган.

Мазкур низомнинг 5-бандига кўра, иккинчи ва ундан кейинги олий таълим бўйича қабул параметрлари олий таълим муассасасининг илмий-педагогик салоҳияти ва моддий-техник базаси ҳисобга олинган ҳолда олий таълим муассасаси кенгаши томонидан белгиланади.

Шу боис, Ўзбекистон Республикаси Ҳуқуқни муҳофаза қилиш академияси Мувофиқлаштириш-васийлик кенгашининг 2024 йил 25 июндаги 2-сонли йиғилиши баёни билан иккинчи ва ундан кейинги олий таълимга қабул қилиш тартиби  белгиланди.

Унга кўра, Академияда 2024/2025 ўқув йилидан эътиборан иккинчи ва ундан кейинги олий таълимнинг бакалавриат "60420100 - Юриспруденция (прокурорлик фаолияти)" йўналишини сиртқи таълим шаклида жорий этилди.

Иккинчи ва ундан кейинги олий таълимни олиш истагини билдирган абитуриентлар Олий таълим, фан ва инновациялар вазирлигининг махсус электрон тизими (ikkinchitalim.edu.uz) орқали рўйхатдан ўтиши лозим.

Кириш имтиҳонлари тест синовлари шаклида “Ҳуқуқшунослик фани” бўйича Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан ўтказилади.

Шунингдек, тест синовларида иштирок этиш учун барча талабгорлардан базавий ҳисоблаш миқдорининг ярим баравари миқдорида тўлов ундирилади.

Шу билан бирга, иккинчи ва ундан кейинги олий таълим бакалавриатнинг “60420100 – Юриспруденция (прокурорлик фаолияти)” йўналишини сиртқи таълим шаклига ўқишга қабул қилиш тўлов-контракт асосида амалга оширилади.