Конференция материаллари янги тўплами нашр этилди

Ўзбекистон Республикаси Ҳуқуқни муҳофаза қилиш академияси томонидан “Ҳуқуқни муҳофаза қилиш соҳасида юридик таълим ва фан: замонавий тенденциялар ва истиқболлари” мавзусидаги халқаро илмий-амалий конференция материаллари 2 жилдли тўплам шаклида нашр этилди.

Унда юридик илм-фанда этика қоидаларининг ўзига хос хусусиятлари, юридик ёрдамнинг ҳуқуқий асослари, бепул юридик ёрдам кўрсатиш имкониятлари, одил судловни амалга ошириш, маъмурий судлар томонидан норматив-ҳуқуқий ҳужжатларнинг қонунийлигини текшириш ва прокуратура органлари томонидан беғараз юридик ёрдам кўрсатиш каби бир қатор долзарб масалалар ўрин олган.

Тўпламда Малайзия коррупцияга қарши Академияси директори, Хитой Халқ Республикаси Миллий прокурорлар коллежи директори, Россия Федерациясининг бир қатор юридик таълим муассасалари раҳбарлари, Франция суд ҳокимияти миллий мактаби раҳбари, Белорусия прокуратураси ҳузуридаги илмий-амалий институт директори, Қозоғистон Республикаси прокуратураси ҳузуридаги ҳуқуқни муҳофаза қилувчи органлар академияси вакиллари, Қозоғистон, Қирғизистон, Ўзбекистон прокуратуралари органлари амалиётчи ходимлари, Ўзбекистон Республикасида юридик фан соҳасида кўзга кўринган олимлар, докторантлар, мустақил изланувчилар ва бошқа ёш олимларнинг илмий мақолалари ҳамда тезислари баён этилган.