Мажбурий ижро бюроси органлари тезкор ходимлари иштирокида малака ошириш курси бошланди

Ўзбекистон Республикаси Бош прокуратураси Академиясида 2018 йилнинг 29 октябридан Бош прокуратура ҳузуридаги Мажбурий ижро бюроси органлари тезкор ходимлари иштирокида “Мажбурий ижро бюроси тезкор бўлинмалари томонидан истеъмолчиларнинг тўлов интизомига риоя этишлари устидан назорат фаолиятининг самарадорлигини ошириш” мавзусидаги малака ошириш курси бошланди.

Дастурга асосан, мамлакатимизда амалга оширилаётган кенг қамровли ислоҳотлар жараёнида қонун устуворлигини таъминлаш ва қонунийликни мустаҳкамлашда прокуратура органлари олдига қўйилаётган вазифаларнинг мазмун-моҳияти, Бюро томонидан электр энергиясини талон-торож қилиш механизмларини аниқлаш, бу турдаги ҳуқуқбузарликларни фош этиш ҳамда жиноятчиликка қарши курашишда Ўзбекистон Республикасининг “Тезкор-қидирув фаолияти тўғрисида”ги Қонун талабларини ҳуқуқни қўллаш амалиётига тўғри татбиқ этиш масалалари бўйича маъруза ва амалий машғулотлар ўтказилиши назарда тутилган.

Малака ошириш курси давомида тингловчилар ўзларининг амалий фаолиятларида келиб чиқаётган муаммоли вазиятларни таҳлил қилиб, Академия профессор-ўқитувчилари томонидан тегишли касбий ҳуқуқий тушунтиришлар олишади.