2024/2025 ўқув йилининг тантанали очилиш маросими бўлиб ўтди

2024 йил 9 сентябрь куни Ўзбекистон Республикаси Ҳуқуқни муҳофаза қилиш академиясида янги 2024/2025 ўқув йилининг тантанали очилиш маросими бўлиб ўтди.

Академияда янги ўқув йилининг бошланиши танишув ҳафталиги билан нишонланиб, унда Академиянинг “Юриспруденция” (прокурорлик фаолияти) ва “Юриспруденция” (тергов фаолияти) ихтисосликлари бўйича 1-курс бакалавриат босқичи талабалари ҳамда магистратуранинг “Прокурорлик фаолияти”, “Тергов фаолияти”, “Коррупцияга қарши курашиш” ва “Инсон ҳуқуқларига оид халқаро ҳуқуқ” мутахассисликлари бўйича тингловчилари Академияда ўқув жараёнини ташкил этиш тартиби билан атрофлича танишишлари мумкин.

Тадбирда Бош прокуратура, ИИВ, Ҳуқуқни муҳофаза қилиш академияси раҳбарияти, Академия талаба ва тингловчилари, уларнинг ота-оналари, ОАВ вакиллари иштирок этдилар.

Тадбирни Ўзбекистон Республикаси Бош прокурори ўринбосари, Ҳуқуқни муҳофаза қилиш академияси бошлиғи в.в.б, 3-даражали давлат адлия маслаҳатчиси С.И.Самадов кириш сўзи билан очиб, талабаларни ўқишга муваффақиятли кирганликлари билан табриклади ва уларга ўқишларида, келгусидаги фаолиятида катта муваффақият ва зафарлар тилади.

Таъкидландики, бугунги кунда Ҳуқуқни муҳофаза қилиш академияси прокуратура ҳамда суриштирув ва тергов фаолиятини амалга ошириш ваколатига эга давлат органлари учун малакали кадрлар тайёрлашга масъул ягона ихтисослаштирилган олий таълим ва илмий-тадқиқот муассасаси ҳисобланади.

Талабалар ва уларнинг ота-оналари ҳам тадбирда сўзга чиқиб, ўз ҳаяжон ва таассуротларини, ўзлари танлаган касбига бўлган интилишлари, кириш имтиҳонларини муваффақиятли топшириш тажрибалари, ҳамда келгусидаги режалари билан ўртоқлашдилар.

Тадбир иштирокчилари Академияда ўқишни ташкил этишнинг ўзига хос жиҳатлари, Академия кафедра, марказлари ва бўлимларининг ўзига хос хусусиятлари ва йўналишлари, яратилган ва изчил равишда кенгайтирилаётган замонавий таълим инфратузилмаси, таълим, фан ва амалиёт ўртасидаги ўзаро узвий алоқани таъминлаш борасида яратилган ноёб имкониятлар билан яқиндан танишиш имконига эга бўлдилар.

Шунингдек, тадбир дастуридан мустақиллик дарслари, талабаларни кредит-модуль тизими ва уни ўқув жараёнига татбиқ этиш тартиби, таълим муассасасининг ички тартиб-қоидалари ва бошқа зарур маълумотлар билан яқиндан таништиришга қаратилган турли тадбирлар ўрин олган.

Ҳафта давомида талабаларга Ўзбекистон Республикаси Бош прокуратураси, Ўзбекистон прокуратураси музейига ташриф буюриш, шунингдек, Академиянинг халқаро академик мобиллик соҳасидаги имкониятлари билан танишиш, Академия олий таълимдан кейинги таълим институтида таҳсил олиш, илмий лойиҳаларда иштирок этиш ва ҳ.к. имкониятлари билан таништириш тадбирлари амалга оширилади.