Ихтисослаштирилган прокурорлар корпуси ходимлари учун манзилли малака ошириш курси

Академияда Бош прокурор томонидан ўқув жараёнини прокуратура органларининг касбий фаолияти билан узвий боғлиқлигини таъминлашга оид белгиланган вазифалар ижроси доирасида Ихтисослаштирилган прокурорлар корпусининг туман (шаҳар) прокурорлари ва уларга тенглаштирилган прокурорлари ёрдамчилари учун “Юқори инстанция судларида жиноят ишларини кўрилишида прокурор ваколатини таъминлаш масалалари” мавзусида малака ошириш курси ташкил этилди.

Мазкур малака ошириш курси аралаш таълим шаклида ташкил этилган бўлиб, унга кўра замонавий педагогик ва ахборот-коммуникация технологияларини қўллаган ҳолда масофавий таълим ва аудитория машғулотлари назарда тутилган.

Ўқув машғулотлари давомида мамлакатимизда амалга оширилаётган суд-ҳуқуқ ислоҳотлари шароитида амалдаги қонунчиликка киритилаётган янгиликлар, суд қарорларини қайта кўриш институти такомиллаштирилишининг зарурати, суд қарорларининг ижроси билан боғлиқ амалиётда мавжуд бўлган муаммолар қонун талаблари ва суд-прокурор амалиёти материалларининг таҳлили асосида ёритилади.

Курс дастурининг масофавий қисмида тингловчилар Академия порталига жойлаштирилган ўқув материалларини мустақил ўрганиб, натижалари электрон тарзда баҳоланадиган амалий топшириқларни бажарадилар. Академиянинг тегишли профессор-ўқитувчилари тингловчилар билан мунтазам синхрон учрашган ҳолда мустақил ўрганилган ўқув материаллари бўйича суҳбатлар ўтказадилар ҳамда мустақил ўрганиш натижаларини таҳлил қилиб борадилар.

Ўқув курсининг аввалида тингловчиларига суд-прокурор амалиётидаги долзарб масалалар тақсимланган ҳолда мустақил ўрганишлар ўтказиш ва курс натижалари бўйича лаборатория иши доирасида тақдимот ҳимоясига тайёрланиш вазифаси қўйилди.