Ҳуқуқни муҳофаза қилиш фаолиятини психологик таъминлашни самарали ташкил этиш чоралари

Ҳуқуқни муҳофаза қилиш академияси томонидан ҳуқуқни муҳофаза қилиш фаолиятини психологик таъминлаш, прокуратура органлари ходимлари ва Академия тингловчиларини ахлоқий-руҳий қўллаб-қувватлаш мақсадида психодиагностика, психопрофилактика ва психокоррекция йўналишларида тизимли ишлар олиб борилмоқда.

Академиянинг касбий психология ва бошқарув фаолияти кафедраси моддий-техник ва методологик базаси изчил такомиллаштириб борилмоқда. Хусусан, Академия фаолиятига замонавий психофизиологик ускуналар – Америка қўшма штатлари ва Россия Федерациясида ишлаб чиқилган энг илғор полиграфлар жорий этилди.

Академияда шунингдек психофизиологик лаборатория шароитида полиграф ускуналарини қўллаш юзасидан махсус таълим дастури ҳам жорий этилмоқда. Илғор хорижий амалиёт мазкур технологияларнинг жиноятларни тергов қилиш сифати ва самарасини оширишда ижобий таъсир кўрсатишидан далолат беради.

Ушбу чоралар жиноятчиликка қарши курашиш ва жамиятда хавфсизликни таъминлаш фаолияти самарасини оширишга хизмат қилади. Кадрлар тайёрлаш жараёнида замонавий самарали технологияларни қўллаш бўлажак терговчиларнинг билим ва кўникмаларини шакллантириш, амалиётчи ходимлар малакасини ошириш, шунингдек мамлакатимизда жиноятчилик даражасини пасайтиришга йўналтирилган қарорларни амалга оширишга хизмат қилади.