Мустақил изланувчиликка онлайн танлов

Ўзбекистон Республикаси Бош прокуратураси Академиясида 2020 йилнинг 20 май куни 12.00.03 – Фуқаролик ҳуқуқи. Тадбиркорлик ҳуқуқи. Оила ҳуқуқи. Халқаро хусусий ҳуқуқ; 12.00.05 – Меҳнат ҳуқуқи. Ижтимоий таъминот ҳуқуқи; 12.00.07 – Суд ҳокимияти. Прокурор назорати. Ҳуқуқни муҳофаза қилиш фаолиятини ташкил этиш. Адвокатура ихтисосликлари бўйича мустақил изланувчиликка (PhD) қабул қилиш бўйича навбатдаги танлов ўтказилди.

Пандемия сабабли аввалги саралашлардан фарқли ўлароқ, илк маротаба талабгорлар билан онлайн тарзда суҳбат ўтказилди.

Унда Бош прокуратура Академияси, Тошкент давлат юридик университети ва Судьялар Олий кенгаши ҳузуридаги Судьялар олий мактабининг етакчи олимлари, хусусан, юридик фанлар докторлари Б.Х.Пўлатов, Ф.Х.Рахимов, М.М.Мамасиддиқов, К.О.Синдоров, Ш.А.Исмоилов ва С.Б.Холбаевлар иштирок этди.

Суҳбатда комиссия аъзолари томонидан суд-ҳуқуқ соҳасида мамлакатимизда амалга оширилаётган ислоҳотларнинг мазмун-моҳияти, талабгорларнинг илмий иш бўйича кўникмалари, тадқиқот мавзуларининг долзарблиги ва аҳамияти ҳақида саволлар берилди.

Мустақил изланувчиликка (PhD) қабул қилиш юзасидан навбатдаги танлов якуни бўйича тегишли қарор қабул қилинди.