“Молиявий разведканинг тезкор ва стратегик таҳлили учун илғор таҳлилий услублар” мавзусида ташкил этилган минтақавий тренингда иштирок

Ўзбекистон Республикаси Ҳуқуқни муҳофаза қилиш академияси вакиллари Қозоғистон Республикасининг Олмата шаҳрида бўлиб ўтган “Молиявий разведканинг тезкор ва стратегик таҳлили учун илғор таҳлилий услублар” мавзусида ташкил этилган минтақавий тренингда иштирок этди.

Мазкур тренингдан мақсад иштирокчиларнинг оператив ва стратегик таҳлил ўтказишда илғор технологиялар ёрдамида очиқ манбалардаги маълумотлардан разведка мақсадида фойдаланиш борасидаги билимларини ошириш ҳисобланади.

Ушбу тадбирда Қозоғистон, Тожикистон, Туркманистон, Ўзбекистон ва Қирғиз Республикаси давлат органлари вакиллари, халқаро экспертлар ҳамда БМТнинг Наркотиклар ва жиноятчилик бўйича бошқармасининг мутахассислари иштирок этди.

Тадбир халқаро экспертлар томонидан икки қисмга, яъни назарий ва амалий қисмга бўлиб ўтказилди.

Тадбирда рақамли технологияларнинг ривожланиб бориши жараёнида иноятларнинг янги турларининг юзага келиб бориши, бу эса ўз навбатида, ҳуқуқни муҳофаза қилувчи органлар, шу жумладан, молиявий разведка бўлинмалари очиқ манбалардаги маълумотлар асосида оператив ва стратегик таҳлил ўтказишда илғор таҳлилий услублардан фойдаланиш лозимлиги таъкидланди.

Халқаро экспертлар маърузаларида очиқ манбалар асосида маълумотларни тўплаш ва таҳлил қилиш (OSINT), молиявий операциялар бўйича маълумотларни тўплаш ва таҳлил қилиш (FININT), очиқ манбалар асосида маълумотларни тўплаш воситалари, уларнинг молиявий разведка бўлинмаси фаолиятидаги ўрни ҳамда улардан оператив ва стратегик таҳлил жараёнида фойдаланиш имкониятлари, ижтимоий тармоқлар таҳлили каби масалалари атрофлича кўриб ўтилди.

Бундан ташқари, мазкур соҳада халқаро ва идоралараро ҳамкорликни самарали ташкил этиш масалалари муҳокама қилинди.

Тадбирнинг иккинчи қисмида, амалий машғулотлар жараёнида иштирокчилар гуруҳларга бўлиниб, OSINT ва FININT имкониятларидан фойдаланиш борасидаги кўникмаларини оширдилар.

Иштирокчиларда Ўзбекистон вакиллари томонидан жиноий фаолиятдан олинган даромадларни легаллаштириш ва терроризмни молиялаштириш каби ҳуқуқбузарликларни аниқлашда шу каби воситалардан фойдаланиш борасидаги тажрибалари қизиқиш уйғотди.

Тадбир якунида иштирокчилар томонидан бу каби тренингларни тизимли ўтказиш ушбу йўналишда ҳуқуқни муҳофаза қилувчи органлар ходимларининг билим ва кўникмаларини ҳамда ҳуқуқбузарликларни аниқлаш ва тегишли чоралар кўришда фаолият самарадорлигини оширишига хизмат қилиши таъкидлаб ўтилди.