Ўзбекистон – Қозоғистон: прокуратура органлари салоҳиятини юксалтириш бўйича ҳамкорлик мустаҳкамланмоқда

Ўзбекистон Республикаси Ҳуқуқни муҳофаза қилиш академиясида Қозоғистон Республикаси Бош прокуратураси ҳузуридаги Ҳуқуқни муҳофаза қилувчи органлар академияси сўровига кўра “Терроризм ва экстремизмга қарши курашиш соҳасида Ўзбекистон Республикасининг Ҳуқуқни муҳофаза қилувчи органлари ва бошқа идораларнинг фаолияти” мавзусида малака ошириш курси ташкил этилди. Курс тингловчилари Қозоғистон Республикаси Бош прокуратура ҳамда унинг ҳузуридаги Ҳуқуқни муҳофаза қилувчи органлар академияси амалдаги ходимларидан иборат бўлди.

Курс дастури экстремистик ва террорчилик ҳаракатларни вужудга келиш сабаблари ва омиллари, экстремизм ва терроризмга қарши курашиш бўйича Ўзбекистон Республикаси миллий қонунчилиги,  экстремизм ва терроризмга қарши курашиш соҳасида қонунчилик ижроси устидан прокурор назорати, терроризм ва экстремизм билан боғлиқ жиноят ишларини тергов қилишнинг криминалистик жиҳатлари, террорчилик акти содир этилган жойни кўздан кечиришнинг ўзига хос жиҳатлари ва бошқа долзарб мавзуларни ўз ичига олган.

 “Кибертерроризм: кибермаконда дин омили ва радикаллашув”, “Экстремистик ва террористик фаолият учун жавобгарлик: малакалаш муаммолари”, “Можароли ҳудудлардан қайтариб олиб келинганларни реабилитация ва реинтеграция қилиш: Ўзбекистон тажрибаси”  мавзуларидаги ўқув машғулотлари тингловчиларда алоҳида қизиқиш уйғотди.

Малака ошириш курси доирасида бир қатор сайёр машғулотлар ташкил этилди. Хусусан, Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш дерпартаментида ташкил этилган машғулот давомида Департаментнинг терроризмни молиялаштирилишига қарши курашиш фаолияти юзасидан маълумотлар берилди.

Ўзбекистон халқаро ислом академиясида исломдаги асосий йўналиш ва оқимлар, диний фундаментализм ва фанатизм, экстремизм ва терроризмга қарши курашишда Ўзбекистон мусулмонлар идораси ва Дин ишлари бўйича қўмитанинг роли атрофлича кўриб чиқилди.

Тошкент шаҳар ИИББда ташкил этилган сайёр ўқув машғулоти жараёнида тингловчилар Ўзбекистон Республикаси Ички ишлар вазирлиги органларининг экстремизм ва терроризмга қарши курашишдаги фаолияти билан яқиндан танишдилар.

Тошкент  вилояти Паркент туман прокуратураси ва Тошкент  шаҳар прокуратурасига ташриф ташкил этилиб, қозоғистонлик ҳамкорлар ҳудудий прокуратураларнинг ушбу йўналишдаги фаолияти билан таништирилди.

Малака ошириш курси якунида Қозоғистон Республикаси Бош прокуратураси делегацияси аъзоларига махсус сертификатлар топширилди.