Манфаатлар тўқнашувининг олдини олиш бўйича малака ошириш курслари давом этмоқда

Ўзбекистон Республикасининг “Манфаатлар тўқнашуви тўғрисида”ги Қонуни мазмун-моҳиятини жамоатчилик орасида кенг тушунтириш ва хабардор қилишга қаратилган фаолият доирасида Ҳуқуқни муҳофаза қилиш академиясининг Коррупцияга қарши курашиш илмий-таълим маркази томонидан “Манфаатлар тўқнашуви ҳолатларини аниқлаш, уларни бартараф этиш ҳамда олдини олиш” мавзусида малака ошириш курси ишлаб чиқилди ва жорий этилди.

Малака ошириш курси Академиянинг ахборот-таълим портали имкониятларини қўллаган ҳолда масофавий шаклда ташкил этилди. Курс билан 43 000 нафарга яқин давлат органлари ва ташкилотлари ходимларидан иборат тингловчилар аудиторияси қамраб олинган.

Жойларда ўқув жараёнини самарали ташкил этиш мақсадида ўқиш тартиби ҳамда электрон платформа имкониятларини тушунтириш бўйича семинар машғулотлари ташкил этилмоқда.

Навбатда семинар Академия томонидан Ўзбекистон Республикаси Коррупцияга қарши курашиш агентлиги ходимлари учун ташкил этилди.

Интерактив жараёнда тингловчилар ўзларини қизиқтирган саволларига жавоб олдилар, шунингдек зарур кўникмаларни шакллантириш мақсадида электрон платформа имкониятларини синаб кўрдилар.