Академия вакили хорижий тренингда эксперт сифатида иштирок этди

Ўзбекистон Республикаси Ҳуқуқни муҳофаза қилиш академияси вакили Ашхобод шаҳрида (Туркманистон) “Терроризмни молиялаштириш ва оммавий қирғин қуролини тарқатишни молиялаштиришга доир мақсадли молиявий санкцияларни қўллаш борасида ФАТФ стандартларини имплементация қилишда ЕХҲТ иштирокчи-давлатларнинг илғор тажрибаси” мавзусида ташкил этилган семинарда эксперт сифатида иштирок этди.

Мазкур тадбир ЕХҲТнинг Ашхободдаги офиси томонидан Жиноий даромадларни легаллаштиришга ва терроризмни молиялаштиришга қарши курашиш бўйича Евроосиё гуруҳи билан ҳамкорликда Туркманистоннинг ҳуқуқни муҳофаза қилувчи, назорат қилувчи ва бошқа давлат органлари ҳамда пул маблағлари ёки бошқа мол-мулк билан операцияларни амалга оширувчи ташкилот вакиллари учун ташкил этилди.

Ҳуқуқни муҳофаза қилиш академияси вакили ўз чиқишларида шахсларни санкциявий рўйхатларга киритиш, ишга солмай тўхтатиб қуйиш чоралари ва таъқиқлар, мақсадли молиявий санкцияларни қўллаш самарадорлигини таъминлаш механизмлари ва санкцияларни четлаб ўтиш билан боғлиқ масалалар билан таништирди. Мазкур чиқишлар доирасида мақсадли молиявий санкцияларни қўллаш бўйича Туркманистон қонунчилиги ва амалиётининг таҳлили натижалари тўғрисида маълумот тақдим этилди.

Шунингдек, амалий машғулотлар сессияси давомида иштирокчиларни гуруҳларда ишлаши ташкил этилиб, ҳар бир гуруҳ иштирокчиларининг фаолияти ҳусусиятидан келиб чиқиб алоҳида машқлар берилди ва бажариш натижалари муҳокама қилинди.

Семинарнинг якуний қисми мақсадли молиявий санкцияларни самарали қўллаш мақсадида Туркманистон миллий қонунчилиги ва амалиётини такомиллаштириш бўйича тавсияларга бағишланди.

Ҳуқуқни муҳофаза қилиш академияси вакили ўзининг барча чиқишлари доирасида иштирокчиларни хорижий, шу жумладан Ўзбекистон Республикасининг илғор тажрибаси билан таништирди.