Коррупцияга қарши курашиш мавзусидаги минтақавий тренингда иштирок этилди

Ҳуқуқни муҳофаза қилиш академияси вакиллари жорий йилнинг 21-24 октябрь кунлари Халқаро валюта жамғармасининг Марказий Осиё, Мўғулистон ва Кавказ мамлакатлари салоҳиятини ривожлантириш минтақавий маркази томонидан Олмаота шаҳрида ташкил этилган “Макроиқтисодий масалаларга таъсир ўтказувчи коррупцияга қарши курашиш” мавзусидаги минтақавий тренингда иштирок этди.

Тўрт кунлик тренингда Ўзбекистон, Қозоғистон, Тожикистон, Қирғиз Республикаси, Грузия, Арманистон, Озарбайжон ва Мўғулистон давлатларида коррупцияга қарши курашиш ва унинг олдини олишга масъул бўлган коррупцияга қарши курашиш агентликлари, прокуратура органлари, Марказий банк ва шунга ўхшаш органлар ходимлари қатнашишди.

Тадбир Халқаро валюта жамғармаси, БМТнинг Гиёҳвандлик ва жиноятчилик бўйича бошқармаси экспертлари томонидан олиб борилиб, унда иштирокичлар Халқаро валюта жамғармасининг бошқариш ва коррупцияга қарши курашишга оид ёндашувлари, коррупцияга қарши курашиш бўйича самарали тадбирларни режалаштириш, ҳуқуқий ва институционал ислоҳотларнинг коррупцияга қарши курашиш усулининг бир қисми сифатида, коррупцияга қарши ислоҳотлар учун майдон яратиш каби сессияларда мавзуга доир маълумотлар ва ахборотлар ўрганиб чиқилди.

Тадбир иштирокчиларга мамлакатнинг иқтисодий барқарорлигини яхшилашда коррупцияга қарши курашиш, бу борада амалга оширилиши мумкин бўлган ташкилий, ҳуқуқий ва институционал ислоҳотлар, Халқаро валюта жамғармасининг бу йўналишдаги вазифалари ва имкониятлари ҳақидаги фойдали маълумотларни тушуниш ва ўрганишга имкон берди.