Халқаро ҳуқуқ бўйича дебат клубининг кузги мавсумига старт берилди

Ҳуқуқни муҳофаза қилиш академиясининг интеллектуал ўйинлар залида “Тергов фаолияти” йўналиши 2-босқич талабалари учун ташкил этилган “Халқаро ҳуқуқда аҳоли” мавзусидаги дебат клубининг кузги мавсумига старт берилди. Мазкур платформа талабаларнинг интеллектуал салоҳиятини ошириш, ижтимоий фаоллигини юксалтириш ва юридик билимларини мустаҳкамлашга қаратилган самарали восита сифатида хизмат қилади.

Дебатлар илмий одоб ва баҳс маданиятига таянган ҳолда ўтказилади. Бу жараён талабаларнинг юридик фанларни чуқур ўзлаштириши, танқидий фикрлаш ва ҳимоя нутқини ривожлантириши учун катта имконият яратади. Назария ва амалиёт уйғунлигига асосланган мунозаралар орқали талабалар турли ижтимоий ва ҳуқуқий муаммоларни холис баҳолаш, юридик асосланган қарорлар қабул қилиш кўникмаларини такомиллаштирадилар.

Тадбир иштирокчилари таъкидлаганидек, дебат клуби нафақат билим беришга, балки турли юридик олийгоҳлар талабаларини бирлаштиришга ҳам хизмат қилади. Мазкур мулоқот майдони талабаларга ўз фикрларини эркин баён қилиш, ҳозиржавоблик ва мураккаб саволларга жавоб топишда ёрдам беради. Шунингдек, у ёш мутахассислар ўртасида ўзаро алоқаларни мустаҳкамлаш, келгусидаги касбий ҳамкорликлар учун замин яратишни мақсад қилган.

Дебатлар ҳар ҳафта мунтазам равишда турли ҳуқуқий мавзуларда ўтказилади ва иштирокчилар танланган мавзу бўйича тезислар тайёрлаб, уларни ҳимоя қиладилар. Ушбу клубнинг фаолияти доирасида амалиётчи юристлар ва профессорлар билан учрашувлар, халқаро ҳуқуқ ва қонунчилик муаммолари бўйича маҳорат дарслари ва семинарлар ташкил этилади.

Бундан ташқари, дебат клуби республика миқёсидаги барча юридик олийгоҳлар талабаларини ушбу платформада бирлаштиришни мақсад қилиб, турли танловлар ўтказишни режалаштирган.

Ҳуқуқни муҳофаза қилиш академияси ушбу дебат клуби орқали ёшларга инновацион таълим методларини тақдим этишни мақсад қилмоқда ва талабаларни ҳар бир мунозарада фаол иштирок этишга чорлайди.