Ҳиндистон Миллий криминалистика университети билан ўзаро ҳамкорлик тўғрисида англашув меморандуми имзоланди

Жорий йилнинг 28 октябрь куни Ўзбекистон Республикаси Ҳуқуқни муҳофаза қилиш академияси ва Ҳиндистон Миллий криминалистика университети ўртасида ўзаро ҳамкорлик тўғрисида англашув меморандуми имзоланди. Ушбу ҳужжат икки томонлама муносабатларни ривожлантиришда муҳим қадам бўлиб, узоқ муддатли ҳамкорлик учун асос яратади.

Миллий криминалистика университети киберҳуқуқ, криминология, жиноий одил судлов, криминалистика (шу жумладан рақамли криминалистика), сунъий интеллект ва киберхавфсизликка ихтисослашган олий таълим муассасаси ҳисобланади. Университет 10 дан ортиқ филиалларга эга бўлиб, 80 дан ортиқ таълим дастурларини таклиф қилади. Талабалар сони 5000 нафардан ошади ва 90 дан ортиқ хорижий ҳамкорлар билан битим ва меморандумлар имзоланган.

Имзоланган меморандум икки томонлама ҳамкорликни мустаҳкамлаш ва ҳамкорликнинг янги шаклларини ривожлантиришга қаратилган. Меморандум таълим ва юриспруденциянинг долзарб масалалари бўйича ахборот ва тажриба алмашиш, қўшма илмий тадқиқотларни амалга ошириш, академик алмашинув ва қўшма ташрифларни ташкил этиш, тренинг, семинар ва конференциялар ўтказиш ҳамда экспертлар ўртасида касбий алоқаларни ривожлантиришни назарда тутади. Шунингдек, ўзаро манфаатли лойиҳаларни амалга ошириш ҳам меморандум доирасидаги муҳим йўналишлардан бири сифатида белгиланган.

Учрашув якунида томонлар ҳамкорлик келишувини самарали амалга ошириш масалаларини муҳокама қилдилар. Тарафлар қўшма лойиҳаларни ишлаб чиқишга алоҳида эътибор қаратиб, келгуси ҳамкорликнинг устувор йўналишлари ва энг муҳим соҳаларини белгилаб олдилар. Эришилган келишувлар томонлар ўртасидаги ўзаро манфаатли ҳамкорлик муносабатларини мустаҳкамлашга ҳамда уларни янада ривожлантиришга хизмат қилади.