Бош прокуратура Академиясида Ўзбекистон Республикаси жиноят қонунчилигини такомиллаштириш бўйича ишчи гуруҳнинг навбатдаги йиғилиши бўлиб ўтди

2018 йил 26 октябрь куни Бош прокуратура Академиясида халқаро экспертлар иштирокида жиноят қонунчилигини такомиллаштириш бўйича ишчи гуруҳнинг навбатдаги йиғилиши бўлиб ўтди.

Йиғилишда ишчи гуруҳнинг доимий аъзолари, жумладан Ўзбекистон Республикаси Олий Мажлиси, Олий суд, прокуратура ва ички ишлар органлари, ТДЮУ вакиллари, шунингдек, халқаро эксперт Горан Клименчич (Словения) иштирок этди. Эксперт қонунчиликни энг самарали халқаро тажрибага асосланган ҳолда такомиллаштириш масаласида ҳамкорлик қилишга тайёрлигини билдириб, мазкур соҳада амалга оширилаётган ислоҳотларнинг самарадорлигини кучайтириш борасида ўз маслаҳатларини берди.

Муҳокама доирасида ишчи гуруҳ ҳаволаки нормалар, судланганлик ҳолати, унинг ҳуқуқий оқибатлари, маъмурий преюдиция, муқобил жазо турлари ва уларни тайинлаш тартиби, жазони алмаштириш механизми, жиноятлар таснифи, қилмишларни криминализация ва декриминализация қилиш масалалари юзасидан мунозаралар бўлиб ўтди.

Шунингдек, Г.Клименчич қонунчиликка инсонпарварлик, қонун олдида барчанинг тенглиги каби тамойилларни таъминлашга, рецидив жиноятларни камайтиришга, шунингдек, жамоат тартибини кучайтиришга қаратилган пробация институтини киритишнинг аҳамиятига алоҳида тўхталиб ўтди.