Қўшма лойиҳа доирасида АҚШ Давлат департаменти вакилларининг Академияга ташрифи

Ҳуқуқни муҳофаза қилиш академиясига АҚШ Давлат департаменти теророризмга қарши курашиш бюросининг бюджет директори А.Носир ва Марказий Осиё бўйича дастур вакили Б.Стернс ташриф буюрди. Тадбирда Академия фаолиятига жалб қилинган эксперт Р.Джойс ҳам иштирок этди.

Учрашув давомида томонлар “Минтақавий мулоқот” ХННТ ва АҚШ Давлат департаментининг Терроризмга қарши кураш бюроси билан ҳамкорликда жиноий фаолиятдан олинган даромадларни легаллаштириш ва терроризмни молиялаштиришга қарши курашиш соҳасида мураббийлик ва ўқитиш бўйича қўшма лойиҳани амалга ошириш масалаларини муҳокама қилдилар.

Шунингдек томонлар келгусида ҳуқуқни муҳофаза қилувчи органлар ходимлари учун АҚШлик экспертлар иштирокида махсус малака ошириш ўқув курслари, дастурларни ташкил этиш ҳамда ўқув модулларини хорижий амалиёт асосида такомиллаштириш юзасидан фикр алмашдилар.

Ташриф давомида хорижий ҳамкорлар Академиядаги таълим инфратузилмаси ҳамда илмий ва таълим фаолиятини ташкил этиш жараёнлари билан яқиндан танишдилар.