Жиноий фаолиятдан олинган даромадларни легаллаштиришга қарши курашиш бўйича тренинг

Ҳуқуқни муҳофаза қилиш академияси “Минтақавий мулоқот” ХННТ билан ҳамкорликда Ўзбекистон Республикасининг молиявий ва номолиявий ташкилотлари учун жиноий фаолиятдан олинган даромадларни легаллаштиришга қарши курашиш бўйича тренинг ташкил этди.

Уч кунлик тадбир АҚШ Давлат департаментининг Терроризмга қарши кураш бюроси томонидан молиялаштирилаётган жиноий даромадларни легаллаштиришга ва терроризмни молиялаштиришга қарши курашиш бўйича мураббийлик ва тренинг лойиҳаси доирасида ташкил этилди.

АҚШлик халқаро экспертлар томонидан ўтказилган тадбирда тижорат банклари, тўлов ташкилотлари, нобанк ташкилотлари, биржа аъзолари, қимматли қоғозлар бозорининг профессионал иштирокчилари, лизинг хизматлари кўрсатувчи ташкилотлар, почта алоқаси операторлари, суғурта бозори иштирокчилари, риелторлик ташкилотлари, нотариуслар, қимматбаҳо металлар ва қимматбаҳо тошлар билан операцияларни амалга оширувчи шахслар иштирок этдилар.

Семинарда асосий эътибор мижозларни лозим даражада текшириш, юқори хавфли мижозларга нисбатан кўрилаётган чора-тадбирлар, шубҳали транзакция ҳисоботини аниқлаш ва шакллантириш, мақсадли молиявий санкцияларни қўллашга қаратилган.

Тадбир давомида жиноий фаолиятдан олинган даромадларни қонунийлаштириш ва терроризмни молиялаштириш тенденциялари ва усуллари ҳам муҳокама қилинди.

Шунингдек, иштирокчилар ўз амалиётлари асосида тажриба алмашиш, муаммоларни муҳокама қилиш ва уларни биргаликда ҳал қилиш йўлларини ишлаб чиқиш имконига эга бўлдилар. Тадбир молиявий жиноятларнинг олдини олишда ҳуқуқни муҳофаза қилувчи органлар ва хусусий сектор вакилларининг ўзаро ҳамкорлигини кучайтиришга хизмат қилади.