АНОНС: Халқаро илмий-амалий конференция ўтказилиши ҳақида

2024 йил 21-22 ноябрь кунлари Ўзбекистон Республикаси Ҳуқуқни муҳофаза қилиш академияси ташкил этилганининг икки йиллиги муносабати билан “Ҳуқуқни муҳофаза қилиш фаолияти соҳасида глобал чақириқлар ва таҳдидлар: замонавий стратегия ва ечимлар” мавзусида халқаро конференция бўлиб ўтади.

Тадбирда фан ва таълим соҳасидаги 50 дан ортиқ хорижий экспертлар, шунингдек кўп сонли миллий экспертлар, етакчи олимлар ва ҳуқуқни муҳофаза қилиш соҳаси амалиётчи ходимлари, тадқиқотчилар иштирок этиши кутилмоқда.

Конференция дастуридан “Ҳуқуқни муҳофаза қилиш фаолияти соҳасида глобал чақириқлар ва таҳдидлар: замонавий стратегия ва ечимлар” мавзусида ялпи мажлис, шунингдек “Коррупция, жиноий маблағларни қонунийлаштириш, терроризмни молиялаштиришга қарши кураш: янги чақириқ ва тенденциялар”, “Тергов фаолиятини ташкил қилишда янги ёндашувлар: рақамли криминалистиканинг аҳамияти”, “Ҳуқуқни муҳофаза қилиш соҳасида фан ва таълим, сунъий интеллектни қўллашнинг долзарб масалалари”, “Одам савдоси билан боғлиқ жиноятларни тергов қилиш устидан прокурор назорати самарадорлигини ошириш масалалари” мавзуларида параллел сессиялар ўрин олган.

Шунингдек, тадбир доирасида “БМТ Коррупцияга қарши Конвенциясини амалга ошириш механизми: иккинчи цикл таҳлили” мавзусида БМТнинг Коррупцияга қарши Конвенцияси бўйича давлатлар иштирокчилари модели ўтказилиши назарда тутилган.

Халқаро илмий-амалий конференция якунига кўра илмий мақола ва тезислар тўплами нашр этилиши режалаштирилган.

Мақола ва тезисларга қўйилган талаблар (ҳавола).