Навбатдаги амалий маҳорат дарслари ўтказилди

Академияда талабаларни ҳуқуқни муҳофаза қилувчи органларнинг таълим муассасалари профессор-ўқитувчилари ҳамда амалиётчи-ҳарбий хизматчи (ходим)лари билан ҳамкорликда касбий тайёргарлиги бўйича билим, кўникма ва малакаларини шакллантириш ва ривожлантиришга, уларни келгуси хизмат фаолиятига тайёрлашга алоҳида эътибор берилмоқда.

Ҳусусан, ўқув режа ва дастурларга мувофиқ “Ҳарбий ва жисмоний тайёргарлик” модули доирасида “Саф тайёргарлиги” фанининг илк машғулоти “Қуролсиз бажариладиган саф амаллари ва ҳаракатлари” мавзусида 1-курс талабалари билан ушбу соҳани асл мутахассислари – Ўзбекистон Республикаси Миллий гвардиясининг Фахрий қоровул батальони ҳарбий хизматчилари иштирокида амалий маҳорат дарси тарзида ўтказилди.

Машғулотнинг кириш қисмида ҳарбий хизматчилар саф тайёргарлиги бўйича кўргазмали чиқишларини намойиш этдилар, кейин эса талабалар билан қад ростлаб туриш, жойда туриб бурилишлар, ҳарбийча салом бериш, сафдан чиқиш ва сафга қайтиш, барабанлар садоси остида ҳаракатлар ва юриш давомида бурилиш каби ўқув саволлари амалий кўриб чиқилди.