Академия талабалари экологик плоггинг марафонида иштирок этди

Академия талабаларидан иборат жамоа навбатдаги плоггинг экологик марафонида фаол иштирок этди. Шунингдек, марафонда Тошкент шаҳрида фаолият юритувчи корхона ва ташкилотлар вакиллари, экофаоллар ҳамда маҳаллий аҳоли иштирок этдилар.

Тадбир Тошкентнинг Миробод ва Яккасарой туманлари ҳудудида жойлашган махсус танланган трасса бўйлаб ташкил этилди. Марафоннинг ўзига хос жиҳати шундаки, қатнашчилар нафақат югуриш машқлари билан шуғулландилар, балки атроф-муҳитни муҳофаза қилиш мақсадида йўналиш бўйлаб чиқиндиларни йиғиб, шаҳар кўчаларини тозаладилар.

Плоггинг экологик марафони икки муҳим мақсадни амалга оширди: иштирокчилар соғлиғини мустаҳкамлаш, шунингдек она табиат яхшиланишига ҳисса қўшиш.

Шунингдек, тадбир иштирокчилари орасида экологик саводхонликни оширишга қаратилган тушунтириш ишлари олиб борилди. Уларнинг экоҳаёт тарзи ва чиқиндиларни қайта ишлашга оид хабардорлиги янада оширилди.

Марафон натижасида Миробод ва Яккасарой туманлари ҳудудидан бир неча ўн қоп чиқинди йиғилди ва қайта ишлаш марказларига юборилди. Барча иштирокчиларга рамзий совғалар тақдим этилди.

Плоггинг марафонлари фуқаролар ўртасида экологик ташаббус ва ҳаракатларни бирлаштириш ва ҳамжиҳатликни мустаҳкамлашга, шунингдек шаҳар экологик ҳолатини яхшилашга катта ҳисса қўшади.