Akademiya talabalari ekologik plogging marafonida ishtirok etdi

Akademiya talabalaridan iborat jamoa navbatdagi plogging ekologik marafonida faol ishtirok etdi. Shuningdek, marafonda Toshkent shahrida faoliyat yurituvchi korxona va tashkilotlar vakillari, ekofaollar hamda mahalliy aholi ishtirok etdilar.

Tadbir Toshkentning Mirobod va Yakkasaroy tumanlari hududida joylashgan maxsus tanlangan trassa bo‘ylab tashkil etildi. Marafonning o‘ziga xos jihati shundaki, qatnashchilar nafaqat yugurish mashqlari bilan shug‘ullandilar, balki atrof-muhitni muhofaza qilish maqsadida yo‘nalish bo‘ylab chiqindilarni yig‘ib, shahar ko‘chalarini tozaladilar.

Plogging ekologik marafoni ikki muhim maqsadni amalga oshirdi: ishtirokchilar sog‘lig‘ini mustahkamlash, shuningdek ona tabiat yaxshilanishiga hissa qo‘shish.

Shuningdek, tadbir ishtirokchilari orasida ekologik savodxonlikni oshirishga qaratilgan tushuntirish ishlari olib borildi. Ularning ekohayot tarzi va chiqindilarni qayta ishlashga oid xabardorligi yanada oshirildi.

Marafon natijasida Mirobod va Yakkasaroy tumanlari hududidan bir necha o‘n qop chiqindi yig‘ildi va qayta ishlash markazlariga yuborildi. Barcha ishtirokchilarga ramziy sovg‘alar taqdim etildi.

Plogging marafonlari fuqarolar o‘rtasida ekologik tashabbus va harakatlarni birlashtirish va hamjihatlikni mustahkamlashga, shuningdek shahar ekologik holatini yaxshilashga katta hissa qo‘shadi.