Россия Федерацияси Бош прокурори бошчилигидаги делегациянинг ташрифи

Жорий йилнинг 20 ноябрь куни Ҳуқуқни муҳофаза қилиш академиясига Россия Федерацияси Бош прокурори И.В.Краснов бошчилигидаги делегация вакилларининг ташрифи амалга оширилди.

Ташриф давомида делегация Aкадемиянинг тузилмаси ва асосий фаолият йўналишлари, прокуратура ва тергов органлари ходимларини тайёрлаш, қайта тайёрлаш ва малакасини оширишни ташкил этиш тизими ҳамда ўқув жараёни билан таништирилди.

Шунингдек, делегация вакиллари Академияда амалий кўникмаларни ўзлаштиришга қаратилган замонавий таълим инфратузилмаси, таълим жараёнида қўлланилаётган замонавий технологиялар ва ёндашувлар, Рақамли криминалистика илмий-тадқиқот Институти ҳамда Коррупцияга қарши курашиш виртуал академияси фаолияти билан танишдилар. Меҳмонлар Академия юридик клиникаси, криминалистик полигонлар, лабораториялар, суд имитацияси хонаси ва бошқа амалий ва симуляцион машғулотлар ўтказишга мўлжалланган махсус хоналар, шунингдек, ахборот-ресурс марказини кўздан кечирдилар.

Учрашув конструктив руҳда ўтди. Академиянинг илм-фан, таълим ва амалиётнинг ўзаро уйғунлигига асосланган таълим фаолияти меҳмонларда катта қизиқиш уйғотди. Томонлар прокурор-тергов кадрларини тайёрлаш, қайта тайёрлаш ва уларнинг малакасини ошириш соҳасида ҳамкорликни кенгайтиришга келишиб олдилар.

Ташриф доирасида шунингдек Россия Федерацияси Бош прокуратураси вакиллари иштирокида Академия тингловчилари учун маърузалар ташкил этилди.

Маърузалар бир қатор долзарб муаммолар, жумладан рақамли жиноятчиликка қарши курашишда прокуратуранинг турли идоралар фаолиятини мувофиқлаштирувчи роли, активларни қайтариш соҳасида халқаро ҳамкорликнинг муҳим жиҳатлари, самарали ҳамкорликни таъминловчи механизмлар ва ҳуқуқий воситалар кўриб чиқилди.

Курс якунида иштирокчиларга сертификатлар топширилди.