“Ҳуқуқни муҳофаза қилиш фаолияти соҳасидаги глобал чақириқлар ва таҳдидлар: замонавий стратeгиялар ва ечимлар” халқаро илмий-амалий конференцияси ўз ишини бошлади

2024 йил 21 ноябрь куни Тошкент шаҳрида Ўзбекистон Республикаси Ҳуқуқни муҳофаза қилиш академияси ташкил этилганининг икки йиллиги муносабати билан “Ҳуқуқни муҳофаза қилиш фаолияти соҳасидаги глобал чақириқлар ва таҳдидлар: замонавий стратeгиялар ва ечимлар” мавзусида халқаро конференция бошланди.

Конференциянинг мақсади таълим жараёнида инновацион ёндашувларни муҳокама ва таҳлил қилиш учун ягона платформа яратиш, замонавий чақириқларни инобатга олган ҳолда ҳуқуқни муҳофаза қилиш ва тергов фаолияти соҳасида кадрлар тайёрлаш борасида тажриба алмашиш, ҳуқуқни муҳофаза қилиш ва тергов фаолиятига оид қонунчилик базасини такомиллаштиришга оид тавсиялар ва амалий илмий ёндашувларни ишлаб чиқишдан иборат.

Анжуман ялпи ва тематик параллел сессиялар шаклида ташкил этилган бўлиб, тадбирнинг биринчи куни коррупция, жиноий маблағларни қонунийлаштириш, терроризмни молиялаштиришга қарши курашишда янги чақириқ ва тенденциялар, тергов фаолиятида рақамли криминалистиканинг аҳамияти, ҳуқуқни муҳофаза қилиш соҳасида фан ва таълим, сунъий интеллектни қўллаш, одам савдоси билан боғлиқ жиноятларни тергов қилиш устидан прокурор назорати самарадорлигини ошириш масалалари атрофлича муҳокама қилинди.

Конференция ишида фан ва таълим соҳасидаги 150 дан ортиқ хорижий ва миллий экспертлар, етакчи олимлар ва ҳуқуқни муҳофаза қилиш соҳасининг тажрибали ходимлари, тадқиқотчилар иштирок этдилар.

Халқаро конференцияни кириш сўзи билан Ўзбекистон Республикаси Бош прокурори ўринбосари С.Б.Ортиқова, Инсон ҳуқуқлари бўйича Ўзбекистон Республикаси Миллий маркази директори, академик А.Х.Саидов, Ўзбекистон Республикаси Олий суди раиси ўринбосари О.Х.Исмаилов, БМТнинг Ўзбекистондаги доимий координатори С.Махл, Элчи, ЭХҲТнинг Ўзбекистондаги лойиҳалари координатори раҳбари А.Карттунен, АҚШнинг Ўзбекистондаги Фавқулодда ва мухтор элчиси Ж.Хеник, "Минтақавий мулоқот" ХННТ ижрочи директори К.Герцҳак, БМТ ГЖБ Афғонистон, Марказий Осиё, Эрон ва Покистон бўйича минтақавий вакили в.в.б., халқаро дастур координатори Ю.Қурбонов очиб бердилар ва  ҳуқуқ-тартибот идоралари фаолиятини самарали ташкил этишда фан ва таълимнинг аҳамияти, соҳада амалга оширилаётган ислоҳотлар, шунингдек, трасмиллий уюшган жиноятчилик ва коррупцияга қарши курашиш, инсон ҳуқуқларини таъминлаш ва бошқа муҳим йўналишларда ҳамкорликдаги лойиҳаларни алоҳида таъкидлаб ўтдилар. 

Конференция ялпи мажлисида Ўзбекистон Республикаси Ҳуқуқни муҳофаза қилиш академияси бошлиғининг биринчи ўринбосари Е.В.Коленко, Беларусь Республикаси Тергов қўмитаси раисининг биринчи ўринбосари О.С.Шандарович, Қозоғистон Республикаси Бош прокуратураси ҳузуридаги Ҳуқуқни муҳофаза қилиш органлари академияси ректори М.Сексембаев, Ўзбекистон Республикаси Ички ишлар вазирлиги Академияси бошлиғи Р.А.Хатамов, Туркия Адлия академияси президенти Муҳитдин Ўздемир, Тошкент давлат юридик университети ректори в.б. И.Р.Рустамбеков, Тожикистон Республикаси Ҳуқуқ-тартибот, қонунийлик, жиноятчиликни ўрганиш ва прокуратура органлари ходимлари малакасини ошириш институти директори Ш.Қурбонзода, Озарбайжон Республикаси Бош прокуратураси илмий-таълим марказининг Стратегик режалаштириш ва хавфларни аниқлаш бошқармаси бошлиғи А.Ожагвердиев кун тартиби юзасидан маърузалари тингланди.

Халқаро конференция доирасида "Ҳуқуқни муҳофаза қилиш соҳасида фан ва таълим, сунъий интеллектни қўллашнинг долзарб масалалари", "Тергов фаолиятини ташкил этишга янгича ёндашувлар: рақамли криминалистиканинг роли", "Коррупцияга қарши курашиш, жиноий фаолиятдан олинган даромадларни легаллаштиришга ва терроризмни молиялаштиришга қарши курашиш: замонавий муаммолар ва тенденциялар", шунингдек “Одам савдоси билан боғлиқ жиноятларни тергов қилиш устидан прокурор назорати самарадорлигини ошириш масалалари” мавзуларида параллел сессиялар бўлиб ўтди.

Ўтказилган сессиялар натижаларига кўра, конференциянинг ҳуқуқни муҳофаза қилиш соҳасидаги илмий ва таълим салоҳиятини ошириш, масъул органлар фаолиятида инсон ҳуқуқларини таъминлаш, коррупцияга қарши стандартларни имплементация этиш, терроризмни молиялаштириш ва жиноий активларни тиклаш, идоралараро ва халқаро ҳамкорликни мустаҳкамлашга қаратилган амалий тавсиялари қабул қилинди.

Халқаро илмий-амалий конференция натижалари тўплам шаклида чоп этилади.

Конференция ўз ишини 22 ноябрь куни давом эттиради.