“Кибержиноятларни текшириш бўйича энг яхши амалиётлар” халқаро давра суҳбати ўтказилди

2024 йилнинг  22 ноябрида Ҳуқуқни муҳофаза қилиш академиясида “Ҳуқуқни муҳофаза қилиш фаолияти соҳасидаги глобал чақириқ ва даъватлар: замонавий стратегия ва қарорлар” мавзусидаги халқаро илмий-амалий конференция доирасида “Кибержиноятларни текшириш бўйича энг яхши амалиётлар” мавзусида халқаро давра суҳбати бўлиб ўтди.

Тадбирларда Беларусь Республикаси Дастлабки терговни рақамли ривожлантириш бош бошқармаси, Россия Федерацияси Тергов қўмитасининг суд-экспертиза бош бошқармаси, Интерпол, Ички ишлар вазирлиги Академияси, ИИВ академияси етакчи мутахассислари, Ўзбекистон Республикаси Жамоат хавфсизлиги университети, Тошкент давлат юридик университети профессор-ўқитувчилари, тингловчилари ва талабалари иштирок этди.

Давра суҳбатида трансмиллий SCAM уюшган гуруҳларининг жиноий фаолияти, Darknet тармоғида содир этилган жиноятлар, киберфирибгарлик, гиёҳвандлик воситаларининг ноқонуний айланиши билан боғлиқ жиноятларга қарши кураш, лицензиясиз фаолият юритувчи криптобиржалар фаолиятига оид маърузалар муҳокама қилинди.

Жонли мунозара шаклида бўлиб ўтган тадбир жараёнида илғор тажриба алмашинуви асосида миллий ва хорижий қонунчилик, шунингдек кибержиноятчиликка қарши соҳадаги ҳуқуқни қўллаш амалиёти таҳлил қилинди.