“Замонавий тергов амалиётида инсон ҳуқуқларига оид янги ёндашувлар” мавзусидаги республика ёш ҳуқуқшунослар конференцияси

2022 йил 28 ноябрдаги Ўзбекистон Республикаси Президентининг “Жиноятларни тергов қилиш соҳасида малакали кадрларни тайёрлашни сифат жиҳатидан янги тизимини жорий этиш тўғрисида”ги ПФ-257-сон Фармонига асосан Ўзбекистон Республикаси Ҳуқуқни муҳофаза қилиш академияси ташкил этилиб, жиноятларни тергов қилиш соҳасида кадрларни амалиёт билан узвий боғлиқлигини таъминлаган ҳолда ягона ёндашув асосида тайёрлашга қаратилган узлуксиз ўқув тизимини йўлга қўйилган.

2024 йил 28 ноябрда Ўзбекистон Республикаси Ҳуқуқни муҳофаза қилиш академиясига асос солинганлигига икки йил тўлган куни олий ҳарбий ва олий юридик таълим муассасалари талабалари иштирокида “Замонавий тергов амалиётида инсон ҳуқуқларига оид янги ёндашувлар” мавзусидаги республика ёш ҳуқуқшунослар республика илмий-амалий конференцияси ўтказилди.

Конференцияда 20 дан ортиқ олий юридик таълим муассасалари, жумладан Ўзбекистон Республикаси Ички ишлар вазирлиги Академияси, Амир Темур номидаги Давлат хавфсизлик хизмати академияси, Ўзбекистон Республикаси Божхона қўмитасининг Божхона институти, Тошкент давлат юридик университети, Ўзбекистон Республикаси Жамоат хавфсизлиги университети ва вилоятлардаги университетларнинг юриспруденция соҳаси бўйича таълим олаётган талабалари иштирок этдилар.

Сўнгги йилларда мамлакатимизда дастлабки тергов ва суриштирув жараёнида шахснинг ҳуқуқ ва эркинликлари ишончли ҳимоя қилиниши, унинг шаъни ва қадр-қиммати ҳурмат қилинишини таъминлаш тизимини такомиллаштиришга алоҳида эътибор қаратилмоқда.

Бугунги кунда Академияда “Тергов фаолияти” бакалавриат таълим йўналишида 400 нафардан ортиқ талабалар дастлабки тергов ва суриштирув органларининг тергов тармоқларига хизматга тайёрланмоқда. Магистратура мутахассислигининг “Тергов фаолияти” йўналиши бўйича ҳам дастлабки тергов ва суриштирув органларидан танлаб олинган тингловчилар таҳсил олмоқда.

Конференцияда таълим олувчиларда инсон ҳуқуқ ва эркинликларига сўзсиз риоя қилиш маданияти билан уйғунлашган юксак маънавий, психологик, таҳлилий ва касбий сифатларни ривожлантиришнинг самарали тизимини жорий этишга қаратилган ёндашувлар борасида талабаларнинг фикр ва мулоҳазалари эшитилди, экспертлар томонидан томонидан билдирилган фикр ва мулоҳазаларга ўзларининг муносабатларини билдирдилар.