“Хорижий жангари-террористлар билан боғлиқ жиноятларни тергов қилиш ва уларни жиноий таъқиб қилиш” мавзусидаги ўқув курси

Ўзбекистон Республикаси Бош прокуратураси ва Бош прокуратура Академияси томонидан АҚШнинг Федерал тергов Бюроси, Адлия вазирлиги, Миллий контртеррористик маркази ҳамда OPDAT дастури билан ҳамкорликда “Хорижий жангари-террористлар билан боғлиқ жиноятларни тергов қилиш ва уларни жиноий таъқиб қилиш” мавзусида амалиётчи мутахассислар учун ўқув курси ташкил этилди.

Ўқув курси 9 сессиядан иборат бўлиб, 30 октябрдан 1 ноябр кунига қадар ўтказилди. Тадбирда Бош прокуратура Академияси профессор-ўқитувчилари, Ўзбекистон Респуликаси Бош прокуратураси ҳамда ҳудудий прокуратуралар, Ички ишлар вазирлиги тизими ва Давлат хавфсизлик хизмати ходимлари қатнашди.

Тадбирнинг биринчи кунида ИШИД террористик ташкилоти, бошқа хорижий террористик ташкилотларининг Марказий Осиёдаги фаолияти ҳамда уларнинг ИШИД террористик ташкилотлари билан алоқаси, Работ меморандуми мазмун-моҳияти, АҚШ тажрибасида хорижий жангари-террористлар билан боғлиқ жиноят ишларини юритиш бўйича маърузалар ўқилди.

Ўқув курсининг иккинчи кунида терроризм билан боғлиқ жиноят ишларини тергов қилиш ва бу турдаги ишлар бўйича жиноий таъқиб юзасидан АҚШ тажрибаси ёритилди.

Курснинг учинчи кунида машғулотлар гипотетик сценарийдан фойдаланган ҳолда кичик гуруҳларда ўтказилди ҳамда келгусида кўзда тутилган тадбирлар учун мавзулар шакллантирилди.  

Иштирокчилар ўзларини қизиқтирган саволларига жавоб олишди, тадбир самарали ўтди ҳамда кутилган натижаларга эришилди. Ўқув курси якунида иштирокчиларга сертификатлар топширилди.