Кибержиноят ва кибертаҳдидларнинг олдини олиш мавзусида давра суҳбати ўтказилди

Ахборот технологиялари ёрдамида содир этиладиган жиноятларнинг олдини олиш, киберхавфсизлик борасида ёшларнинг хабардорлигини ошириш мақсадида Академияда “Кибержиноят ва замонавий кибертаҳдидлар” мавзусида давра суҳбати ташкил қилинди.

Тадбирда Академиянинг Рақамли криминалистика илмий-тадқиқот институти, Ички ишлар вазирлиги Тезкор-қидирув департаменти киберхавфсизлик маркази ва Юнусобод тумани ИИБ масъул ходимлари иштирок этдилар.

Ахборот технологиялари ёрдамида виртуал майдонда ҳуқуқбузарлик ва жиноятга қўл урган шахслар орасида ёшлар кўпчиликни ташкил этиши, уларнинг аксарияти 16-23 ёш оралиғидаги ўсмир-ёшларни ташкил этиши ёшлар орасида киберхавфсизликни таъминлаш ва кибержиноятлар профилактикасини бугунги кун тартибига олиб чиққани соҳа эксперт мутахассислари томонидан таъкидланди.

Етакчи амалиётчи мутахассислар глобал тараққиёт шароитида киберхавфсизликни таъминлашнинг муҳим жиҳатлари, интернет тармоғи орқали содир этилаётган ҳуқуқбузарликларнинг барвақт олдини олиш, шунингдек кибергигиена борасида тадбир иштирокчиларига атрофлича маълумотларни бериб ўтдилар.