Барқарор ривожланиш соҳасида Академия ташаббуслари ва натижалар

Академияни дунёнинг энг нуфузли “ТОП-1000” олий таълим муассасалари рейтингига киритиш бўйича чора-тадбирлар дастури амалга ошириб келинмоқда.

Мазкур дастурга мувофиқ Академиянинг фаолияти ва ички ҳужжатлари халқаро рейтинг талабларига мувофиқлаштирилди. Академиянинг Умумий сиёсати ва Барқарор ривожланиш сиёсатига оид ҳужжатлар ишлаб чиқилди. Мазкур ҳужжатлар ўз ичига 20 дан ортиқ йўналишда (таълим ва тадқиқот, академик ҳалоллик ва эркинлик, ҳисобдорлик, масъулиятли истеъмол, энергия ва ресурслардан самарали фойдаланиш, “яшил” харидлар ва ҳ.к.) Академиянинг асосий сиёсати ва тамойилларини белгилайди.

Жорий йилда Академиянинг Барқарор ривожланиш бўйича илк ҳисоботи чоп этилди ҳамда Барқарор ривожланишга оид Академиянинг веб-саҳифаси яратилди. Мазкур ҳисоботда Академия томонидан Барқарор ривожланишнинг 16 та мақсадлари бўйича амалга ошириб келинаётган шаффофлик ва ҳисобдорликка асосланган ишлар ҳамда самарали бошқарувга қаратилган ташаббуслар ўз аксини топган. Ҳисоботда Академиянинг Барқарор ривожланиш мақсадларини ўқув дастурлари, илмий-тадқиқот ва ташкилот фаолиятига татбиқ қилишга бўлган қатъий интилишлари акс эттирилган.

Шунингдек, Барқарор ривожланиш мақсадларига оид алоҳида электив ўқув курслари ишлаб чиқилиб, ушбу мақсадлар таълим жараёнига татбиқ этиб келинмоқда. Академия халқаро нуфузли рейтинг агентликлари экспертлари иштирокида рейтинг кўрсаткичларини яхшилаш бўйича ташкил этилган мастер-класс ва семинар-тренингларда мунтазам иштирок этиб келмоқда.

2024 йилда Академия илк бор Times Higher Education World University Rankings 2025 (дунё университетлари рейтинги) ҳамда Interdisciplinary Science Rankings 2025 (фанлараро илмий тадқиқотлар) рейтингига "репортёр" мақоми билан кирди. Мазкур эътироф Академиянинг ҳуқуқни муҳофаза қилиш соҳасидаги таълим ва тадқиқотларни ривожлантиришга, шунингдек, халқаро ҳамкорликни кенгайтириш ва илғор академик муҳитни яратишга бўлган интилишларини тасдиқлайди.

Мазкур йўналишда ишлар давом эттирилаётган бўлиб, яқин истиқболда Академиянинг нуфузли халқаро рейтингларга кириши белгиланган.