Ўзбекистон Республикаси Қуролли Кучлари академиясига ташриф

Академияда сифатли ва рақобатбардош кадрларни тайёрлашга, ҳаётий мисоллар ва таъсирчан воситалар орқали талабаларни миллий ғоя ва Ватанга садоқат руҳида тарбиялашга, уларнинг қалби ва онгига Ватан ҳимояси шарафли ва муқаддас бурч эканини чуқур сингдиришга, шу билан бирга, уларда ҳарбий хизмат (хизмат)га бўлган чексиз ҳурмат ҳиссини мустаҳкамлашга ва келгуси хизмат фаолиятига тайёрлашга алоҳида эътибор берилмоқда.

Ушбу кечиктириб бўлмайдиган ва долзарб мақсадларга эришиш йўлида 1-курснинг “Тергов фаолияти” ҳарбийлаштирилган таълим йўналиши талабаларининг Қуролли Кучлар академиясига ташрифи ташкиллаштирилди.

Тадбир давомида талабалар Академия музейи, кутубхонаси, спорт мажмуалари, умуман олганда, у ерда курсант ва тингловчиларнинг кундалик турмуш тарзи, уларнинг таълим олиш ва хизмат фаолиятини олиб бориш учун яратилган барча шарт-шароитлар билан яқиндан ва бафуржа танишишга муяссар бўлдилар.

Шу билан бирга, талабалар Ҳарбий ва жисмоний тайёргарлик модули доирасида олаётган билим ва кўникмаларини Академиянинг замонавий электрон тирида ўқотар қуроллардан отиш ва зирҳли техникаларни бошқариш машқларини бажариш орқали синаб кўрдилар.