Прокуратура органлари ходимлари ўртасида илмий-ижодий танловлар давом этмоқда

Ўзбекистон Республикаси Президентининг 2023 йил 31 майдаги “Мамлакатимизда қонун устуворлиги ва прокуратура органларининг аҳоли билан янада яқин ҳамкорлигини таъминлашда ходимларнинг маънавий-интеллектуал салоҳиятини юксалтириш бўйича қўшимча чора-тадбирлар тўғрисида”ги ПҚ–170-сон Қарори ижроси юзасидан Академияда прокуратура органлари ходимлари ўртасида илмий-ижодий танловларнинг якуний натижаларини баҳолаш бўйича ҳайъат йиғилиши ўтказилди.

Ҳайъат йиғилишида Ўзбекистон Республикаси Бош прокуратураси, Ҳуқуқни муҳофаза қилиш академияси, Олий таълим, фан ва инновациялар вазирлиги ҳузуридаги Олий таълим аттестацияси юриспруденция йўналиши экспертлар кенгаши раиси, Судьялар олий кенгаши ҳузуридаги Судьялар олий мактаби, ИИВ Академияси, Тошкент давлат юридик университетидан мутахассислар иштирок этдилар.

Йиғилишда “Миллий нашрларда чоп этилган энг яхши илмий мақола”, “Хорижий илмий нашрларда чоп этилган энг яхши илмий мақола” ҳамда “Энг фаол ҳуқуқ тарғиботчиси” танловларида иштирок этиш учун келиб тушган 56 нафар талабгорларнинг ҳужжатлари кўриб чиқилиб, уларни баҳолаш бўйича тегишли ишчи гуруҳлар шакллантирилди.

Ўз навбатида, танловни ўтказишдан асосий мақсад мамлакатимизда прокуратура органлари ходимларнинг қонун устуворлигини таъминлашда маънавий-интеллектуал салоҳиятини юксалтириш эканлигини инобатга олиб, ҳайъат аъзолари томонидан бу каби танловларда ходимларнинг иштирокини кучайтириш бўйича таклиф ва тавсиялар илгари сурилди.