Ҳуқуқни муҳофаза қилиш академиясида очиқ эшиклар куни

Бугунги кунда Ҳуқуқни муҳофаза қилиш академияси прокуратура ҳамда суриштирув ва тергов фаолиятини амалга ошириш ваколатига эга давлат органлари учун малакали кадрлар тайёрлашга масъул ягона ихтисослаштирилган олий таълим ва илмий-тадқиқот муассасаси ҳисобланади.

Яъни, келгусида прокуратура ва тергов соҳаларида ишлаш мақсадида юрган ёшлар бундай имкониятга фақатгина Ҳуқуқни муҳофаза қилиш академиясида таҳсил олиб эришишлари мумкин.

Академияда тергов фаолияти ва ҳуқуқни муҳофаза қилиш фаолиятининг бошқа соҳаларида олий таълимнинг икки босқичли тизими – бакалавриат ва магистратура дастурлари бўйича тўлақонли ўқув жараёнлари йўлга қўйилган. Ҳозирда 400 нафардан ортиқ талаба “Тергов фаолияти” бакалавриат таълим йўналишида таҳсил олмоқда.

Академия ўз фаолиятини очиқлик ва шаффофлик тамойилларига асосланиб амалга ошириб келади, мунтазам равишда жамоатчилик учун турли тадбирлар, учрашувлар ташкил этилмоқда. 12 декабрь куни ҳам Тошкент шаҳридаги ижтимоий-гуманитар йўналишдаги академик лицейлар, юридик техникумлар ҳамда ҳарбий академик лицейлар битирувчилари учун Академиянинг “Тергов фаолияти” бакалавриат таълим йўналишига ўқишга қабул қилиш бўйича навбатдаги Очиқ эшиклар куни ўтказилди.

Иштирокчилар Академия бакалавриатига қабул ва ўқув жараёнини ташкил этишнинг ўзига хослиги ва афзалликлари билан яқиндан танишдилар.

Академияга қабул қилишда абитуриентларнинг муайян тоифаларига республиканинг бошқа олий таълим муассасаларига кириш учун қонунчилик ҳужжатларида назарда тутилган имтиёзлар татбиқ этилмайди.

Муҳими, Академия битирувчилари ваколатли давлат органларига хизматга қабул қилинганда фақат офицерлар таркибига кирувчи ёки даражали унвон берилиши кўзда тутилган лавозимларга тайинланади.

Академия бакалавриатига қабулни ва таълим жараёнларини ташкил этиш тартиби билан яқиндан таништириш мақсадида меҳмонлар учун экскурсия ташкил этилди. Экскурсия давомида меҳмонлар криминалистика хонаси, суд имитацияси хонаси, экспертиза лабораторияси ва бошқа амалий ҳамда вазиятли машғулотлар ўтказиш учун махсус жиҳозланган хоналарни кўздан кечирдилар.

Республикамизда биринчи бўлиб ташкил этилган Академия DarkWeb киберлабораторияси, тергов жараёнларида полиграф (детектор) технологияларини қўллаш имкониятлари имкониятлари ёшларда айниқса катта қизиқиш уйғотди.

Иштирокчилар Академия бакалавриатига қабулни ва таълим жараёнларини ташкил этиш тартибига оид саволларига атрофлича жавоблар олишди.

Академияда очиқ эшиклар куни ўтказиш яхши анъанага айланиб бўлди, бундай тадбирлар тизимли равишда ўтказиб келинади.

Академия матбуот хизмати

Тел.: 71-202-04-96 (1737)