Академия ходимларининг Швециянинг Лунд университетида навбатдаги стажировкаси

Ҳуқуқни муҳофаза қилиш академияси вакиллари Швециянинг Лунд университетида “Марказий Осиё ҳуқуқи: Марказий Осиёда ҳуқуқий маданиятлар ва бизнес муҳити” лойиҳаси доирасида стажировка ўтаб қайтишди.

Стажировка давомида ходимлар Лунд университетининг ўқитиш, илмий тадқиқотларни олиб бориш тизими билан яқиндан танишиб, бу борада университетнинг етакчи профессор-ўқитувчилари билан илмий учрашувлар ташкил этишди ҳамда керакли тажрибаларга эга бўлишди.

Шунингдек, Лунд университетининг Ҳуқуқ социологияси департаменти томонидан ташкил этилган "Ўқитувчи ва талаба ўртасидаги мулоқотни такомиллаштиришда рақамли технологияларни жорий этиш” ўқув семинарида иштирок этишиб, ўзларининг тадқиқот мавзулари доирасида тақдимотлар қилишди.

Стажировка давомида Академия катта ўқитувчилари Д.Ибрагимов ва О.Нематиллаев томонидан бола тарбияси билан боғлиқ низоларни судларда кўришнинг айрим жиҳатлари, шунингдек амалдаги қонунчиликни коррупцияга қарши экспертиза қилишнинг ҳуқуқий механизмларини такомиллаштириш масалалари ўрганилди.

Стажировка якунида ходимлар томонидан илмий мақолалар тайёрланди ва юқори рейтингга эга бўлган хорижий журналларга юборилди.

Ўзбекистон Республикаси Ҳуқуқни муҳофаза қилиш академияси ҳамда Швециянинг Лунд университети ўртасидаги ҳамкорлик давом этмоқда.